राष्ट्रसङ्घमा इरानी राष्ट्रपति: आत्मसमर्पण गर्दैनौँ

इरानका राष्ट्रपति मसुद पेजेस्कियनले संयुक्त राष्ट्रसङ्घको महासभालाई सम्बोधन गर्दै आफ्नो देशले आत्मसमर्पण नगर्ने बताउनुभएको छ। न्युयोर्कमा जारी ८१औँ महासभामा बुधबार बोल्दै उहाँले युद्ध अन्त्यका लागि कूटनीतिक माध्यमबाट समाधान खोज्न इरान तयार रहेको पनि स्पष्ट पार्नुभएको छ। दबाब र धम्कीले इरानलाई झुकाउन नसकिने भन्दै उहाँले अमेरिकी राष्ट्रपति डोनाल्ड ट्रम्पको अभिव्यक्तिको आलोचना गर्नुभएको हो।

इरानी जनता दबाबसामु नझुक्ने उहाँको भनाइ छ। सम्बोधनका क्रममा उहाँले अमेरिका र इजरायलको आक्रमणको निन्दा गर्दै इरानी जनता आतंकवादका पीडित भएको टिप्पणी गर्नुभयो। इरानमाथि भएका अमेरिकी हमला अवैध रहेको उहाँको दाबी छ।

इरानले आफ्नो प्रतिरक्षा मात्र गरिरहेको भन्दै उहाँले सर्वसाधारणमाथि भएका आक्रमणको विषय पनि महासभामा उठाउनुभएको छ। स्ट्रेट अफ हर्मुजको प्रसङ्ग पनि उहाँको सम्बोधनमा परेको छ। पेजेस्कियनले सम्बोधन सुरु गरेलगत्तै अमेरिकी प्रतिनिधिमण्डल महासभाबाट बाहिरिएको थियो।

यसअघि राष्ट्रपति ट्रम्पले सम्बोधन गर्दा इरानी र क्युबाली प्रतिनिधिमण्डल हलबाट बाहिरिएका थिए। अमेरिका र इरानबीच युद्ध जारी रहेका बेला भएकाले पेजेस्कियनको न्युयोर्क भ्रमणलाई विशेष महत्वका साथ हेरिएको छ।