परराष्ट्रमन्त्री खनाल राष्ट्रसङ्घ महासभाबाट फर्किए, प्रधानमन्त्रीको भारत भ्रमणको मिति तय हुन बाँकी

परराष्ट्रमन्त्री शिशिर खनालले प्रधानमन्त्री बालेन्द्र शाहको भारत भ्रमणको मिति अझै तय नभएको बताउनुभएको छ। संयुक्त राष्ट्रसङ्घको ८१औँ महासभामा सहभागी भएर आज बिहान स्वदेश फर्किएपछि त्रिभुवन अन्तर्राष्ट्रिय विमानस्थलमा पत्रकारसँग कुरा गर्दै उहाँले यस्तो जानकारी दिनुभएको हो। मन्त्री खनालका अनुसार नयाँ सरकार गठन हुनासाथ भारतबाट प्रधानमन्त्रीलाई औपचारिक निमन्त्रणा आएको थियो र नेपालले त्यसलाई सकारात्मक रूपमा लिएको छ।

भ्रमणबारे दुवै पक्षबीच सकारात्मक छलफल भइरहेको र उपयुक्त समयमा परिणाममुखी भ्रमण गर्ने तयारी रहेको उहाँले उल्लेख गर्नुभएको छ। मन्त्री खनाल गत असोज ४ गते महासभामा भाग लिन अमेरिकाको न्युयोर्क प्रस्थान गर्नुभएको थियो। महासभाका अवसरमा उहाँले नेपालको तर्फबाट 'सगरमाथादेखि समुद्रसम्म' नामक जलवायुकेन्द्रित उच्चस्तरीय विशेष कार्यक्रम आयोजना गर्नुभएको थियो।

उहाँले महासभाका साथै त्यस अवसरमा आयोजित विभिन्न उच्चस्तरीय कार्यक्रममा पनि सहभागिता जनाउनुभएको थियो। भ्रमणका क्रममा उहाँले द्विपक्षीय बैठकमा भाग लिनुका साथै विभिन्न देशका समकक्षीसँग आपसी हितका विषयमा छलफल गर्नुभएको थियो। मन्त्री खनालले ८१औँ महासभा नेपालको हित प्रवर्द्धनका लागि निकै फलदायी रहेको दाबी गर्नुभएको छ।

उहाँका अनुसार राष्ट्र तथा सरकार प्रमुखहरूसँगका भेटघाटमा नेपालको राष्ट्रिय स्वार्थ र बाढीपछिको विपद् व्यवस्थापनका विषय विश्व मञ्चमा उठाइएको छ।