नाम्सी पुलमा ढुङ्गा खस्दा मुग्लिन–नारायणगढ सडक एकतर्फी

मुग्लिन–नारायणगढ सडकखण्डको नाम्सी पुलमा माथिबाट ढुङ्गा खस्दा सवारी आवागमन एकतर्फी मात्र सञ्चालन भएको छ। सडक डिभिजन भरतपुरका अनुसार शुक्रबार राति पुलमा ढुङ्गा खस्न थालेपछि बाटोको एकातर्फको भाग अवरुद्ध भएको हो। डिभिजनले जारी गरेको सूचनामा पुलमाथिको ढिस्कोबाट ढुङ्गा झर्ने क्रम अझै नरोकिएको उल्लेख छ।

विशेषगरी राति यो खण्ड हुँदै यात्रा गर्ने चालक र यात्रुलाई होसियारी अपनाउन डिभिजनले आग्रह गरेको छ। नेपाल यातायात व्यवसायी राष्ट्रिय महासङ्घका अध्यक्ष सरोज सिटौलाले भोटेकोशीको बाढीसहित विभिन्न क्षेत्रका विपद्का कारण यसपटक चाडपर्वमा राजमार्गको यात्रा कठिन बनेको बताउनुभएको छ। जल तथा मौसम विज्ञान विभागका अनुसार देशभर मनसुनी र पश्चिमी वायुको आंशिक प्रभाव छ।

आज कोशी, बागमती, गण्डकी र लुम्बिनी प्रदेशका पहाडी र हिमाली भागमा साधारणतया बादल लाग्ने र थोरै स्थानमा मध्यमसम्मको वर्षा वा हिमपात हुने सम्भावना छ। मधेश प्रदेशसहित कोशी र बागमतीको तराईका एक-दुई ठाउँमा पनि मध्यमसम्म पानी पर्न सक्ने विभागले जनाएको छ। कर्णाली र सुदूरपश्चिमका पहाडी र हिमाली भागमा आंशिक बादल रहने र एक-दुई स्थानमा हल्का वर्षा वा हिमपात हुन सक्ने विभागको पूर्वानुमान छ।