इन्टरनेट शुल्क बढेको छैन, बढी लिए कारबाही: दूरसञ्चार प्राधिकरण

नेपाल दूरसञ्चार प्राधिकरणले इन्टरनेट सेवाको शुल्क नबढेको स्पष्ट पार्दै स्वीकृत दरभन्दा बढी रकम लिने सेवा प्रदायकलाई कारबाही गर्ने चेतावनी दिएको छ। शुल्क बढेको भनी सञ्चारमाध्यममा समाचार आएपछि प्राधिकरणले यो स्पष्टीकरण दिएको हो। प्राधिकरणका अनुसार इन्टरनेट तथा इमेल सेवा प्रदायकबाट शुल्क वृद्धिको कुनै प्रस्ताव आएको छैन र प्राधिकरणले स्वीकृति पनि दिएको छैन।

निर्देशिकाअनुसार प्रदायकले नयाँ दर लागू हुने मितिसहित पूर्वस्वीकृतिका लागि प्रस्ताव पेस गर्नुपर्ने व्यवस्था छ। स्वीकृत दर सार्वजनिक गर्नुपर्ने र उपभोक्तालाई मर्का पर्ने गरी अनधिकृत सेवा चलाउन नपाइने प्राधिकरणले जनाएको छ। नियम उल्लङ्घन गरेमा दूरसञ्चार ऐन तथा नियमावलीअनुसार कारबाही हुने प्राधिकरणले उल्लेख गरेको छ।

कुनै प्रदायकले बढी शुल्क लिएको वा गैरकानुनी सेवा चलाएको पाइए उजुरी गर्न प्राधिकरणले उपभोक्तालाई आग्रह गरेको छ। सेवा प्रदायकले लिने शुल्क उचित र मनासिब हुनुपर्ने प्राधिकरणको भनाइ छ।