नारायणीले चेतावनी तह नाघ्यो, गण्डक ब्यारेजमा पानीको बहाव खतराको सीमा नजिक

लगातारको वर्षाले नारायणी नदीमा बहाव बढेपछि नेपाल–भारत सीमामा रहेको गण्डक ब्यारेजमा पानीको बहाव खतराको सूचकनजिक पुगेको छ। गण्डक ब्यारेज, वाल्मीकिनगरका अनुसार शनिबार बिहान ९ बजे ब्यारेजबाट २ लाख ७३ हजार ६ सय क्युसेक पानी बगिरहेको थियो। ब्यारेजको माथिल्लो भागमा पानीको सतह ३५९ दशमलव ४० फिट र तल्लो भागमा ३५६ दशमलव ८० फिट मापन भएको छ।

पुरानो संरचना भएकाले ब्यारेजमा ३ लाख क्युसेकलाई जोखिमको सीमा मानिन्छ, र हालको बहाव त्यसभन्दा २६ हजार ४ सय क्युसेक मात्र कम छ। नेपालतर्फको देवघाटमा बिहान ८ बजेर ३५ मिनेटमा ३ लाख ४८ हजार क्युसेक बहाव मापन भएको छ र त्यो बढ्दो क्रममा छ। बाढी पूर्वानुमान महाशाखाका अनुसार देवघाटमा नारायणीको सतह ७ दशमलव ४९ मिटर पुगेर ७ दशमलव ३ मिटरको चेतावनी तह नाघेको छ, जहाँ ९ मिटरलाई खतराको तह मानिन्छ।

त्रिशूली, मर्स्याङ्दी, दरमखोला, कालीगण्डकी र म्याग्दीका केही मापन केन्द्रमा पनि चेतावनी तह पार भएको छ। तल्लो तटीय क्षेत्र र डुबान हुने होचा ठाउँका बासिन्दालाई उच्च सतर्कता अपनाउन आग्रह गरिएको छ।