कालीगण्डकी उर्लियो: सेतीवेणी डुबानमा, रुरुक्षेत्रका बस्ती खाली गराइए

अविरल वर्षाले कालीगण्डकी नदी उर्लिएपछि स्याङ्जाको सेतीवेणी डुबानमा परेको छ भने गुल्मीको रुरुक्षेत्रका बस्ती खाली गराउन थालिएको छ। बाढी पूर्वानुमान महाशाखाका अनुसार पर्वतको मोदीवेणीमा कालीगण्डकीको सतह ७ मिटरको चेतावनी तह नाघेर ७ दशमलव ७५ मिटर पुगेको थियो, जुन अहिले घट्दो क्रममा छ। मुस्ताङतर्फबाट लेदोसहितको बाढी मिसिँदा अन्य स्थानमा पनि सतह बढिरहेको छ।

बागलुङ, पर्वत र म्याग्दीका जिल्ला प्रशासन कार्यालयले बेनी, नियरघाट र मालढुङ्गालगायत तटीय क्षेत्रका बासिन्दालाई सुरक्षित स्थानमा बस्न आग्रह गरेका छन्, र प्रहरीले माइकिङ गरिरहेको छ। सेतीवेणी प्रहरी चौकीका अनुसार कालीगण्डकीको बहाव बढेर सेतीखोला थुनिँदा गल्याङ नगरपालिका–५ का १० घर डुबानमा परेका छन्, र जोखिममा रहेकालाई शुक्रबार राति नै सारिएको थियो। रुरुक्षेत्र गाउँपालिका–१ लामोचौपारी आसपास कालीगण्डकी र रिडी खोलाको बहाव बढेपछि वडाध्यक्ष नवराज विकसहित स्थानीय युवाले राति नै घरका सामान सुरक्षित ठाउँमा सारेका छन्।

म्याग्दीको अन्नपूर्ण गाउँपालिका–८ काफलडाँडामा पनि पहिरो खसेको छ, जहाँबाट २०७२ जेठ १० मा खसेको पहिरोले कालीगण्डकी १६ घण्टा थुनेको थियो।