लगातार तीन दिनको भारी वर्षापछि बैंककका सबै ५० जिल्लामा विपद् घोषणा

थाइल्यान्डको राजधानी बैंककमा लगातार तीन दिनदेखि परिरहेको भारी वर्षाले अधिकांश भाग डुबानमा परेपछि सबै ५० जिल्लामा शनिबार विपद् अवस्था घोषणा भएको छ। घोषणासँगै स्थानीय निकायले उद्धार र राहतका काम अघि बढाउन सक्नेछन्। बैंककका गभर्नरका अनुसार बिहीबार दिउँसोदेखि राजधानीमा करिब ३०० मिलिमिटर पानी परिसकेको छ।

पूर्वी बैंकक सबैभन्दा बढी प्रभावित भएको र राजधानीका लगभग सबै नहर भरिइसकेकाले पानी निकास गर्न कठिन भएको गभर्नरले बताउनुभएको छ। उहाँले थप वर्षाको सम्भावना रहेकाले नहर किनारका बासिन्दालाई विशेष सतर्क रहन र सवारीसाधन अग्लो ठाउँमा सार्न आग्रह गर्नुभएको छ। नहरको सतह बढ्दा किनारका धेरै घर र रेस्टुरेन्टमा पानी पसेको छ।

नहर नजिकै बस्ने ६७ वर्षीया सोमकित फ्युक–ङामले पानी कम्मरसम्म पुगेकाले दुई दिनदेखि पसल बन्द गरेको बताउनुभएको छ। दक्षिणपूर्वी क्षेत्र अन नुतमा बासिन्दा घुँडासम्मको पानीमा हिँडिरहेका र घर जोगाउन बालुवाका बोरा थुपारिरहेका देखिएका छन्। बैंककको सार्वजनिक यातायात निकायले अक्टोबर २ सम्म रेल सेवाका 'पार्क एन्ड राइड' पार्किङस्थलमा सवारीसाधन निःशुल्क राख्न दिने व्यवस्था गरेको छ।

विपद् रोकथाम तथा न्यूनीकरण विभागका अनुसार आइतबारसम्म पूर्वी, उत्तरपूर्वी र मध्य थाइल्यान्डमा न्यून चापको प्रभाव रहनेछ। विभागले आकस्मिक बाढी, पहिरो र नदीको सतह बढ्ने जोखिमबारे चेतावनी दिएको छ।