गृहमन्त्री गुरुङ बिमस्टेक गृहमन्त्री बैठकका लागि असोज २६ मा भारत जाने

गृहमन्त्री सुधन गुरुङ बिमस्टेक सदस्य राष्ट्रका गृहमन्त्रीहरूको पहिलो बैठकमा भाग लिन असोज २६ गते भारतको नयाँदिल्ली जाँदै हुनुहुन्छ। गृह मन्त्रालय र नयाँदिल्लीस्थित नेपाली दूतावासले यो जानकारी दिएका छन्। गृहमन्त्रीको जिम्मेवारी सम्हालेपछि गुरुङको यो पहिलो विदेश भ्रमण हुनेछ।

बैठकमा उहाँले नेपालको प्रतिनिधित्व गर्नुहुनेछ। बङ्गालको खाडी क्षेत्रमा बहुक्षेत्रीय प्राविधिक तथा आर्थिक सहयोगका लागि बनेको बिमस्टेकमा नेपाल, भारत, बङ्गलादेश, भुटान, म्यानमार, श्रीलङ्का र थाइल्याण्ड गरी सात मुलुक छन्। सातै सदस्य राष्ट्रका गृहमन्त्री बैठकमा सहभागी हुने कार्यक्रम छ।

बैठकमा साझा चासो र आपसी सहकार्यका विषयमा छलफल हुने अपेक्षा गरिएको छ। भ्रमणकै क्रममा असोज २७ गते गुरुङ र भारतका गृहमन्त्री अमित शाहबीच भेट तय भएको छ। प्रधानमन्त्री बालेन्द्र शाहको भारत भ्रमणको तयारी चलिरहेका बेला गृहमन्त्री गुरुङ नयाँदिल्ली जान लागेका हुन्।

प्रधानमन्त्री शाह आगामी मंसिर ६ र ७ गते भारत भ्रमणमा जाने कार्यक्रम छ।