६३ महिनासम्म काम नभएपछि मेची करिडोरको ठेक्का अन्त्य, अलपत्र अर्को सडकको ठेक्का प्रक्रिया अघि

पूर्वाधार विकासमन्त्री सुनिल लम्सालले मेची करिडोरअन्तर्गत बेलासे–गोलाखर्क भञ्ज्याङ सडक खण्डको ठेक्का सम्झौता अन्त्य गरिएको जानकारी दिनुभएको छ। इलाम, पाँचथर र ताप्लेजुङ जोड्ने वैकल्पिक सडकको साढे ९ किलोमिटर खण्डको काम लम्बिएपछि यो निर्णय गरिएको हो। २०७८ असार २९ गते करिब २७ करोड रुपैयाँमा सम्झौता भएको यो खण्ड २०८० पुस २९ भित्र सक्नुपर्ने थियो।

मन्त्री लम्सालका अनुसार पटक–पटक म्याद थपेर ६३ महिना दिँदा पनि भौतिक प्रगति करिब ४७ प्रतिशत र वित्तीय प्रगति करिब ४५ प्रतिशतमा सीमित छ। स्रोत सुनिश्चित गरी बहुवर्षीय ठेक्कामार्फत बाँकी काम छिट्टै नयाँ प्रक्रियाबाट अघि बढाइने उहाँले बताउनुभएको छ। सामाजिक सञ्जालमा उहाँले वर्षौंदेखि अलपत्र ठेक्का अब नचल्ने बताउनुभएको छ।

यसैबीच झापाको दमकदेखि इलामको माङ्सेबुङ जोड्ने सडकको माङ्सेबुङ–लारुम्बा–चिसापानी खण्ड कालोपत्रे गर्न नयाँ ठेक्का प्रक्रिया अघि बढेको छ। सडक डिभिजन दमकले नयाँ ठेक्का स्वीकृत गर्ने आशयको सूचना प्रकाशित गरेको छ। सूचनाअनुसार महालक्ष्मी–जय धनञ्जय जेभी करिब १ अर्ब २३ करोड रुपैयाँको कबोल रकमसहित प्रारम्भिक छनोटमा परेको छ।

करिब साढे २५ किलोमिटरको यो खण्ड तीन वर्षभित्र कालोपत्रे गर्ने लक्ष्यसहित २०७६ फागुनमा ठेक्का सम्झौता भएको थियो। यो सडक प्रधानमन्त्री बालेन्द्र शाहको चुनावी एजेन्डामा परेको छ। मन्त्री लम्सालले यसलाई प्रतिबद्धता पूरा गर्ने दिशामा महत्त्वपूर्ण कदम भन्नुभएको छ।