नेपाल पुनर्बीमा कम्पनीमा सरकारको थप हकप्रद सेयर लगानीलाई मन्त्रिपरिषद्को सहमति

सरकारले नेपाल पुनर्बीमा कम्पनी लिमिटेडको हकप्रद सेयरमा थप लगानी गर्ने भएको छ। मन्त्रिपरिषद्को मङ्गलबारको बैठकले यसका लागि अर्थ मन्त्रालयलाई सहमति दिएको छ। यो निर्णय सरकारका प्रवक्ता तथा शिक्षा तथा खेलकुदमन्त्री सस्मित पोखरेलले सार्वजनिक गर्नुभएको छ।

नेपाल रि नामले चिनिने यो कम्पनीको चुक्ता पुँजी हाल करिब १३ अर्ब ४२ करोड रुपैयाँ छ। नेपाल बीमा प्राधिकरणको निर्देशनअनुसार पुनर्बीमा कम्पनीको चुक्ता पुँजी कम्तीमा करिब २० अर्ब रुपैयाँ हुनुपर्छ। प्राधिकरणले २०८० माघमै कम्पनीको चुक्ता पुँजी दोब्बर बनाउने निर्णय गरेको थियो।

बाँकी रकम हकप्रद सेयर निष्कासन गरेर जुटाउने निर्णय कम्पनीले यसअघि नै गरेको थियो। कम्पनीमा सरकारको करिब ४४ प्रतिशत सेयर स्वामित्व छ। सोही हिस्साअनुसार पुँजी पुर्‍याउन सरकारले करिब साढे ३ अर्ब रुपैयाँ लगानी गर्नुपर्ने हुन्छ।

सरकारले आफ्नो हिस्साको लगानी गर्ने वा नगर्ने टुङ्गो नलाग्दा पुँजी वृद्धिको प्रक्रिया लामो समय रोकिएको थियो। सोही अन्योलका बेला धितोपत्रको दोस्रो बजारमा कम्पनीको सेयर मूल्यमा असामान्य उतारचढाव देखिएको थियो। सरकारी हिस्साको लगानी सुनिश्चित भएपछि कम्पनीले हकप्रद सेयर निष्कासनको प्रक्रिया अघि बढाउन सक्नेछ।