त्रिपुरेश्वर बस आगलागी: राहदानी छपाइ र वितरण प्रभावित, छानबिन समिति गठन

काठमाडौँको त्रिपुरेश्वरमा सोमबार एउटा यात्रुवाहक बसमा आगलागी भएपछि राहदानी विभागको छपाइ र वितरण सेवामा अवरोध आएको छ। विभाग परिसर अगाडिको सडकमा लागेको आगोका कारण विभागमा आउने बिजुली र इन्टरनेट लाइन अवरुद्ध भएको विभागले सोमबार सूचना जारी गरी जनाएको छ। बिजुली र इन्टरनेट नहुँदा छपाइ रोकिएको र त्यसको असर वितरणमा परेको विभागको भनाइ छ।

राहदानीका लागि नयाँ आवेदन सङ्कलन भने पहिलेझैँ जारी रहनेछ। समस्या हल भएपछि वितरण पनि नियमित हुने भन्दै विभागले आवेदन दिइसकेका सेवाग्राहीलाई धैर्य गर्न आग्रह गरेको छ। घटनाको छानबिनका लागि २ छुट्टाछुट्टै समिति बनेका छन्।

प्रहरीतर्फ काठमाडौँ उपत्यका प्रहरी कार्यालय रानीपोखरीले प्रहरी वरिष्ठ उपरीक्षक रमेश बस्नेतको संयोजकत्वमा ५ सदस्यीय समिति बनाएको छ, जसलाई ५ दिनभित्र प्रतिवेदन बुझाउन भनिएको छ। जिल्ला प्रशासन कार्यालय काठमाडौँले पनि ७ सदस्यीय छुट्टै समिति बनाएको छ, जसको संयोजक सहायक प्रमुख जिल्ला अधिकारी कृष्णप्रसाद गैहे हुनुहुन्छ। प्रमुख जिल्ला अधिकारी ईश्वरराज पौडेलका अनुसार यो समितिले ७ दिनभित्र प्रतिवेदन दिनेछ।

यसले घटनासँग सम्बन्धित तथ्य र प्रमाण जुटाउनुका साथै सीसीटीभी फुटेज पनि अध्ययन गर्नेछ। आगलागीअघि बस चालक र ट्राफिक प्रहरीबीच विवाद भएको प्रहरीले जनाएको छ, तर आगोको वास्तविक कारण प्रतिवेदनपछि मात्र यकिन हुनेछ।