एमाले बैठकमा असन्तुष्टि: कृष्णगोपालसँग चर्काचर्की, राजीनामा माग्नेप्रति ओलीको आक्रोश

नेकपा एमालेको केन्द्रीय कमिटी बैठकको पहिलो दिन नेता कृष्णगोपाल श्रेष्ठ र अध्यक्ष केपी शर्मा ओलीबीच हलभित्रै चर्काचर्की भएको छ। ओलीले महासचिव शंकर पोखरेललाई नदिई बैठक आफैँ सञ्चालन गर्न थालेपछि श्रेष्ठले त्यो महासचिवको काम भएको भन्दै आपत्ति जनाउनुभएको थियो। श्रेष्ठले नेतृत्वको आलोचना गरिरहँदा ओलीले समय सकियो, बस्नुस् भनेर रोक्न खोज्नुभए पनि उहाँ उभिएरै बोलिरहनुभएको थियो।

स्वयंसेवकले बस्न दबाब दिँदा उहाँले बैठकमा बोल्नै नपाउने हो भनेर आक्रोश पोख्नुभएको छ। बैठकको सुरुमै ओलीले बोल्न चाहनेलाई ३ मिनेट समय तोक्नुभएको थियो। तोकिएको समयमा भ्याउन नसकिएका कुरा लिखित रूपमा बुझाउन सकिने उहाँले बताउनुभएको छ।

बोल्न र आसन छाड्न अध्यक्षको अनुमति अनिवार्य गरिएको छ भने मङ्गलबारदेखि बैठकस्थलमा मोबाइल ल्याउन निषेध गरिएको छ। केही दिनअघि अध्यक्षले स्वविवेकमा राजीनामा दिनुपर्ने बताएका उपमहासचिव योगेश भट्टराईलाई लक्षित गर्दै ओलीले असन्तुष्टि जनाउनुभएको छ। मिडियामा गएर अध्यक्ष हटाउनुपर्ने कुरा गर्ने को न्यायाधीश हो भन्दै उहाँले असहमति पार्टी कमिटीभित्रै राख्न आग्रह गर्नुभएको छ।

बाहिर गएर पार्टीको प्रतिष्ठा घटाउने र विपक्षीलाई खुसी पार्ने गतिविधि नियन्त्रण गरेर पार्टीलाई अनुशासित बनाउनुपर्ने ओलीको भनाइ छ। एमाले अहिले देशकै सबैभन्दा अनुशासनहीन पार्टी बनेकोमा उहाँले दुःख व्यक्त गर्नुभएको छ।