ईश्वर पोखरेलको पत्र: ओलीले सम्मानजनक रूपमा मार्गप्रशस्त गर्नुपर्छ

एमाले नेता ईश्वर पोखरेलले पार्टी अध्यक्ष केपी शर्मा ओलीलाई सम्मानजनक बिदाइ लिँदै नयाँ नेतृत्वलाई बाटो दिन पत्रमार्फत आग्रह गर्नुभएको छ। सोमबार सुरु भएको केन्द्रीय कमिटी बैठकलाई लेखेको पत्रमा उहाँले देशभरका कार्यकर्ताको चाहनाअनुसार ओलीले मार्गप्रशस्त गर्नु विशेष महत्त्वपूर्ण हुने उल्लेख गर्नुभएको छ। पार्टी जटिल अवस्थामा रहेको र पुनर्गठन नगरी पार्टी पङ्क्ति र जनतामा आशा जगाउन नसकिने पोखरेलको तर्क छ।

पार्टीले फेरि गति लिन संस्थागत सुधार र नेतृत्व परिवर्तन आवश्यक रहेको उहाँको भनाइ छ। पोखरेलले पार्टीभित्र विधि र पद्धति कमजोर बन्दै गएको बताउँदै सामूहिक नेतृत्वलाई बलियो बनाउनुपर्नेमा जोड दिनुभएको छ। निर्णय प्रक्रियामा संस्थागत अभ्यास खुम्चिएको र आलोचनात्मक विचारलाई निरुत्साहित गरिएको पनि उहाँले पत्रमा उल्लेख गर्नुभएको छ।

आफू नभए पार्टी नचल्ने र आफू नै सर्वेसर्वा हुने सोच त्याग्नुपर्ने उहाँको आग्रह छ। पुनर्गठन, हस्तान्तरण र रूपान्तरणलाई पार्टीको विधि र प्रक्रियाअनुसार अघि बढाउनुपर्ने पत्रमा उल्लेख छ। ११औँ महाधिवेशनमा अध्यक्ष पदमा ओलीसँग प्रतिस्पर्धा गरेका पोखरेलले त्यसबेला आफूले राखेका र ओलीले नमीठो मानेका भनाइप्रति पत्रमा माफी माग्नुभएको छ।

पारिवारिक कारणले हाल नयाँ दिल्लीमा रहेकाले उहाँ बैठकमा उपस्थित हुनुभएको छैन।