महासभा जानुअघि प्रधानमन्त्रीसँग कांग्रेस नेताको भेट, भोटेकोशी विपद् अन्तर्राष्ट्रियकरण गर्न सुझाव

प्रमुख प्रतिपक्षी नेपाली कांग्रेसका नेताहरूले संयुक्त राष्ट्रसङ्घको महासभामा जान लाग्नुभएका प्रधानमन्त्री बालेन्द्र शाहलाई भेटेर सुझाव दिनुभएको छ। सोमबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा उपसभापति विश्वप्रकाश शर्मा र संसदीय दलका नेता भीष्मराज आङ्देम्बे सहभागी हुनुहुन्थ्यो। प्रधानमन्त्रीका प्रेस तथा अनुसन्धान विज्ञ दीपा दाहालका अनुसार महासभा सम्बोधनअघि परामर्श गर्न प्रधानमन्त्रीले प्रतिपक्षी नेतालाई बोलाउनुभएको हो।

भोटेकोशी विपद्सहित जलवायु परिवर्तनले नेपालमा ल्याएको सङ्कटलाई अन्तर्राष्ट्रियकरण गर्न कांग्रेसले आग्रह गरेको उपसभापति शर्माले बताउनुभएको छ। सभापति गगन थापाको उपस्थितिमा नीति अनुसन्धान तथा प्रशिक्षण प्रतिष्ठानले गरेको छलफलका आधारमा तयार धारणा लिखित र मौखिक रूपमा राखिएको उहाँको भनाइ छ। सिङ्गो देश प्रधानमन्त्रीसँग ऐक्यबद्ध रहेको सन्देश दिन यो भेट गरिएको शर्माले स्पष्ट पार्नुभएको छ।

महासभामा जलवायु न्यायको विषय उठाउन र नेपालको वास्तविक अवस्था विश्वमञ्चमा स्पष्टसँग राख्न पनि प्रधानमन्त्रीलाई सुझाइएको छ। यस्तै, महासभामा जानुअघि सर्वपक्षीय बैठक बोलाउन पनि आग्रह गरिएको छ। प्रधानमन्त्री शाह मङ्गलबार अपराह्न अमेरिका प्रस्थान गर्नुहुनेछ र महासभाको ८१औँ सत्रमा सहभागी हुनुहुनेछ।

बिहीबार उहाँले महासभाको सामान्य बहसलाई सम्बोधन गर्ने कार्यक्रम छ।