राजदूत सिफारिसमा सरकारले आफ्नै मापदण्ड मिच्यो: राप्रपा नेता शाहीको आपत्ति

राजदूत सिफारिसमा सरकारले आफ्नै मापदण्ड मिचेको भन्दै राष्ट्रिय प्रजातन्त्र पार्टीका संसदीय दल नेता ज्ञानेन्द्र शाहीले आपत्ति जनाउनुभएको छ। सोमबार प्रतिनिधिसभाको बैठकमा उहाँले परराष्ट्र मन्त्रालयले तयार पारेको मापदण्ड पढेर सुनाउनुभएको छ। त्यसको १० नम्बर बुँदाअनुसार विदेशी सहयोगमा चल्ने गैरसरकारी संस्थामा हाल काम गरिरहेको व्यक्ति राजदूतका लागि योग्य मानिँदैन।

१४ नम्बर बुँदाले विदेशी राज्यको तलबी पद छाडेको कम्तीमा १० वर्ष पुगेको हुनुपर्ने व्यवस्था गरेको उहाँले उल्लेख गर्नुभएको छ। सरकारले हालै विभिन्न देशका लागि गरेको राजदूत सिफारिस यी मापदण्डअनुरूप नभएको शाहीको दाबी छ। उहाँका अनुसार अमेरिकाका लागि प्रस्तावित व्यक्तिले अक्सफाममा एसिया क्षेत्रका सुरक्षा सल्लाहकार भएर काम गरेका छन्।

स्पेनका लागि प्रस्तावित प्राप्ति शेरचन विश्व बैंकअन्तर्गतको अन्तर्राष्ट्रिय वित्त निगममा कार्यरत रहेको उहाँले बताउनुभएको छ। जर्मनीका लागि प्रस्तावित शारू जोशीले युएन वुमनलगायतका अन्तर्राष्ट्रिय संस्थामा काम गरेको र ओमानका लागि प्रस्तावित पद्माक्षी राणाको पृष्ठभूमि पनि अन्तर्राष्ट्रिय विकास क्षेत्रसँग जोडिएको उहाँको भनाइ छ। शाहीले यसलाई सुशासन हो कि कुशासन भन्दै प्रश्न गर्नुभएको छ।

आफ्नै मापदण्ड लागू गर्न नसक्नुमा विदेशी दबाब वा ठूलो आर्थिक चलखेल हुनसक्ने आशंका पनि उहाँले व्यक्त गर्नुभएको छ।