परराष्ट्रमन्त्री खनाल स्वदेश फर्किए, बाढीपछिको पुनर्निर्माणमा अस्ट्रेलियाको थप अनुदान

परराष्ट्रमन्त्री शिशिर खनाल फिजी, टुभालु र अस्ट्रेलियाको भ्रमण सकेर शनिबार स्वदेश फर्किनुभएको छ। भ्रमणका क्रममा अस्ट्रेलियाले बाढी प्रभावित क्षेत्रको राहत र पुनर्निर्माणका लागि करिब १ करोड ५० लाख अस्ट्रेलियन डलर थप अनुदान घोषणा गरेको मन्त्री खनालले जानकारी दिनुभएको छ। नेपाल राष्ट्र बैंकको आजको खरिद दर १०७ रुपैयाँ ८३ पैसाअनुसार यो रकम झन्डै १ अर्ब ६२ करोड रुपैयाँ बराबर हुन्छ।

मन्त्री खनालका अनुसार बाढी प्रतिकार्यमा अस्ट्रेलियाको कुल सहयोग करिब २ करोड ६० लाख अस्ट्रेलियन डलर पुगेको छ। अस्ट्रेलियाली विदेशमन्त्री वोङसँगको वार्तामा जलवायु सहकार्य, हिमनदी अनुगमन र पूर्वसूचना प्रणाली आधुनिकीकरणबारे छलफल भएको परराष्ट्र मन्त्रालयले जनाएको छ। अस्ट्रेलियाका गभर्नर–जनरल साम मोस्टिनसँगको भेटमा नेपाली डायस्पोरा र नेपाली विद्यार्थीको हितबारे कुराकानी भएको छ।

प्रि–कोप लिडर्स कार्यक्रममा उहाँले हिमनदी पग्लनु र समुद्री सतह बढ्नु एकआपसमा जोडिएका समस्या भएकाले हिमाली र टापु राष्ट्रबीच ‘सगरमाथादेखि समुद्रसम्म’ सहकार्य आवश्यक रहेको बताउनुभएको थियो।