नुवाकोटका बाढीपहिरो प्रभावितलाई वाईसीएलले बनाएका २१ अस्थायी आवास प्रचण्डद्वारा हस्तान्तरण

नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले नुवाकोटमा बाढीपहिरो प्रभावित परिवारका लागि निर्मित २१ वटा अस्थायी आवास हस्तान्तरण गरेका छन्।

रसुवा–भोटेकोशी बाढीबाट घरबास गुमाएका नुवाकोटको बेलकोटगढी र विदुर नगरपालिकाका प्रभावित परिवारका लागि वाईसीएल नेपालले ती अस्थायी आवास निर्माण गरेको हो।

हस्तान्तरण कार्यक्रममा संयोजक प्रचण्डले विकसित र पुँजीवादी देशहरूले अपनाएको गलत विकास मोडल र जलवायु अन्यायका कारण नेपालजस्ता मुलुकहरूले ठूलो मूल्य चुकाउनुपरेको बताए। उनले जलवायु परिवर्तनका नाममा ठूला देशले अत्याचार गरेको र त्यसबाट हुने विपद्को मूल्य नेपालले चुकाउनुपरेको टिप्पणी गरे।

यस वर्ष भदौमा रसुवाको भोटेकोशीमा आएको बाढीले रसुवा तथा त्रिशूली कोरिडोरमा ठूलो जनधनको क्षति पुर्‍याएको थियो।