विराटनगरमा आजदेखि दुईदिने अन्तरप्रदेश मुख्यमन्त्री सम्मेलन, सातै प्रदेशका मुख्यमन्त्री सहभागी

कोशी प्रदेशको राजधानी विराटनगरमा आजदेखि दुईदिने ‘अन्तरप्रदेश मुख्यमन्त्री सम्मेलन–२०८३’ सुरु हुँदैछ। कोशी प्रदेश सरकारको आयोजनामा हुने सम्मेलनमा सातै प्रदेशका मुख्यमन्त्री सहभागी हुनेछन्।

सम्मेलन बिहान ९:३० बजेदेखि सुरु हुने कार्यक्रम छ। सम्मेलनमा सङ्घीयता र विकास साझेदारीका विषयमा छलफल हुने जनाइएको छ।

सङ्घीयता कार्यान्वयनका क्रममा देखिएका संवैधानिक तथा प्रशासनिक जटिलता समाधान गर्दै प्रदेशको अधिकार सुनिश्चित गर्ने विषय सम्मेलनको मुख्य एजेन्डामा रहेको छ। सङ्घीयतालाई सबल बनाउने विषयमा पनि सम्मेलनमा छलफल हुने बताइएको छ।

सम्मेलनका लागि सबै प्रदेशका मुख्यमन्त्री विराटनगरमा भेला हुने कार्यक्रम रहेको छ। आयोजक कोशी प्रदेश सरकारले सम्मेलनको तयारी पूरा गरेको छ।