रास्वपाद्वारा सांसद खगेन्द्र सुनारमाथि छानबिन सुरु, औपचारिक कार्यक्रममा सहभागी हुन रोक

राष्ट्रिय स्वतन्त्र पार्टी (रास्वपा) ले आफ्ना प्रतिनिधिसभा सदस्य खगेन्द्र सुनारमाथि उठेका आरोपबारे आन्तरिक छानबिन सुरु गरेको छ। छानबिन निष्कर्षमा नपुगेसम्म सार्वजनिक पदको हैसियतमा कुनै पनि औपचारिक कार्यक्रममा सहभागी नहुन पार्टीले सुनारलाई निर्देशन दिएको छ।

सुनारसम्बन्धी समाचार सञ्चारमाध्यममा प्रकाशित भएका छन्, उनका श्रव्य सामग्री सार्वजनिक भएका छन् र उनीमाथि गम्भीर प्रश्न उठेका छन्। यसप्रति ध्यानाकर्षण भएको जनाउँदै पार्टीले केन्द्रीय अनुशासन आयोगलाई तत्काल छानबिन गर्न निर्देशन दिएको हो।

सुनारले फोनमार्फत एक महिलामाथि दुर्व्यवहार गरेको भनिएको अडियो सार्वजनिक भएपछि उनी विवादमा तानिएका थिए। उनीमाथि एक महिलालाई धम्क्याएको र ब्ल्याकमेलिङ गरेको आरोप लागेको छ।

यस विषयमा राज्यका निकायले गर्ने अनुसन्धानमा पनि सहयोग गर्ने रास्वपाले जनाएको छ। पार्टीले असोज २७ गते यो निर्णय सार्वजनिक गरेको हो।