निजामती विधेयकको डर: अर्थका दुई सहसचिव र राजस्व विभागका उपमहानिर्देशकको राजीनामा

अर्थ मन्त्रालयअन्तर्गतका दुई सहसचिवले अनिवार्य अवकाश हुनुभन्दा केही महिनाअघि नै सेवाबाट राजीनामा दिनुभएको छ। आन्तरिक राजस्व विभागका उपमहानिर्देशक पदमकुमार श्रेष्ठ र सार्वजनिक ऋण व्यवस्थापन कार्यालयका प्रमुख राजेन्द्रदेव पाण्डेले अर्थसचिव घनश्याम उपाध्यायलाई राजीनामा बुझाउनुभएको हो। श्रेष्ठले सोमबार राजीनामा बुझाउनुभएको जनाइएको छ।

उमेर हदका कारण पाण्डे आगामी फागुनमा र श्रेष्ठ जेठमा अवकाश पाउँदै हुनुहुन्थ्यो। अघिल्लो साता राजस्व विभागअन्तर्गतको ठूला करदाता कार्यालयका प्रमुख कर प्रशासक केदार शर्माले पनि राजीनामा दिनुभएको थियो। संसद्मा दर्ता भएको संघीय निजामती सेवा विधेयकमा ३० वर्षे सेवा अवधि र ५५ वर्षे उमेर हदको प्रस्ताव गरिएको छ।

यो प्रस्तावित प्रावधानको त्रासले माथिल्लो तहका कर्मचारी नियमित अवकाश नपर्खी बाहिरिन थालेका छन्। सामान्य प्रशासन मन्त्रालय स्रोतका अनुसार विधेयक अघि बढेपछिका ४ महिनामा ६०० भन्दा बढी कर्मचारीले राजीनामा दिएका छन्। तीमध्ये करिब ३१ जना सहसचिव र करिब १०८ जना उपसचिव तहका छन्।

सहसचिव तहको राजीनामा सम्बन्धित मन्त्रालय र सामान्य प्रशासन मन्त्रालय हुँदै मन्त्रिपरिषद्‌बाट स्वीकृत हुनुपर्छ। तर स्वीकृति जहिले भए पनि सेवा अवधि राजीनामा बुझाएकै दिनसम्म मात्र गणना हुन्छ।