घोप्टेभिरको पहिरो हट्यो, पृथ्वी राजमार्ग फेरि दुवैतर्फ चल्न थाल्यो

पृथ्वी राजमार्गको घोप्टेभिरमा खसेको सुक्खा पहिरो पन्छाएपछि आइतबार दिउँसो २ बजेर १५ मिनेटदेखि सडक दुवैतर्फ सञ्चालनमा आएको छ। चितवनको इच्छाकामना गाउँपालिका–४ मा पर्ने घोप्टेभिरमा आइतबार बिहान पहिरो खस्दा दुवैतर्फको यातायात ठप्प भएको नेपाल प्रहरी प्रधान कार्यालयले जनाएको थियो। दिउँसो १२ बजेदेखि सडक एकतर्फी खुलाइएको थियो।

एकतर्फी आवागमनका बेला सवारीसाधनलाई लाम लगाएर पालैपालो पठाइएको थियो। जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार दुईतर्फी आवागमन सुरु भएसँगै रोकिएका गाडी गन्तव्यतर्फ लागेका छन्। सडक अवरुद्ध हुँदा तिहार मनाउन घर फर्किँदै गरेका यात्रु समस्यामा परेका थिए।

नौबिसे–मुग्लिन सडक आयोजना पश्चिम खण्डका सूचना अधिकारी इन्जिनियर सचिन्द्र मिश्रका अनुसार झन्डै ३५ मिटर माथिबाट ढुङ्गामाटो झरिरहेकाले सडक सफा गर्न कठिन भएको थियो। उक्त स्थानमा भित्तो नकाटिए पनि माथिबाट आफैँ पहिरो खसेको उहाँले बताउनुभएको छ। जमिन कमजोर रहेकाले जुनसुकै बेला फेरि पहिरो खस्न सक्ने जोखिम कायमै रहेको मिश्रले जनाउनुभएको छ।

यही कारण उक्त खण्डमा यात्रा गर्दा सावधानी अपनाउनुपर्ने देखिएको छ।