चिसो बढेसँगै बाजुराका भेडा र तेह्रथुमका याक–चौँरी बेसीतिर

चिसो बढ्न थालेसँगै बाजुराका भेडापालक र तेह्रथुम सीमावर्ती क्षेत्रका याक–चौँरीपालक किसान पशुसहित बेसीतिर झर्न थालेका छन्। बाजुरामा कात्तिक दोस्रो साताको वर्षासँगै उच्च हिमाली भेगमा हिमपात भएपछि चरन अभाव हुने भन्दै भेडीगोठ तल सारिएका हुन्। बूढीनन्दा नगरपालिका–९ का सुमन थापा परिवारसहित २०० भेडा लिएर साँफे–मार्तडी सडकखण्ड हुँदै अछामको गैलतर्फ हिँडेका छन्।

उनी चैत–वैशाखसम्म बेसीमै बस्ने बताएका छन्। हिउँदमा भेडा लिएर तल झर्ने यो चलन बाजुरामा पुस्तौँदेखि चल्दै आएको छ। पूर्वमा सङ्खुवासभाको नुनढाकी र माडीका माथिल्ला भाग तथा तेह्रथुमको श्रीजुङ र मोराहाङका उच्च क्षेत्रबाट याक–चौँरी गोठ तल झारिएका छन्।

केही महिनाअघिसम्म याक–चौँरीका घण्टी र गोठालाको आवाज सुनिने मिल्के, जलजले र टोप्केगोलाका चरन क्षेत्र अहिले खाली हुँदै गएका छन्। हिमपातसँगै चराउन कठिन हुने, पानीका मुहान जम्ने र चिसो हावा चल्ने भएकाले पालकहरू गोठ तल सार्ने गर्छन्। जल तथा मौसम विज्ञान विभागको पूर्वानुमानअनुसार आज कर्णाली र सुदूरपश्चिम प्रदेशका हिमाली र पहाडी भू-भाग तथा कोशी, बागमती र गण्डकीका हिमाली भू-भागका एक-दुई स्थानमा हल्का वर्षा वा हिमपातको सम्भावना छ।