भन्सार छलेर ल्याइएका भारतीय फूल नष्ट; तिहारभर फूलको कारोबार करिब साढे ६४ करोड पुग्ने आकलन

तिहार र छठलाई लक्षित गरी भारतबाट भन्सार छलेर भित्र्याइएका करिब २८ लाख रुपैयाँ बराबरका फूल सशस्त्र प्रहरी बलले बरामद गरेर नष्ट गरेको छ। सयपत्री, कमल र रजनिगन्धाका यी फूल झापा र धनुषाका विभिन्न सीमावर्ती ठाउँबाट फेला परेका हुन्। झापाको भद्रपुर नगरपालिकास्थित देवीबस्ती इलाकाबाट सशस्त्र प्रहरी गण झापाको ९ जनाको गस्ती टोलीले विशेष सूचनाका आधारमा ११ हजार ३४२ थान सयपत्रीका माला र १२ झोला कमलका फूल नियन्त्रणमा लिएको थियो।

यी फूलको मूल्य करिब २५ लाख ६३ हजार रुपैयाँ रहेको जनाइएको छ। ती फूल सम्बन्धित प्रतिनिधिको रोहबरमा गण कार्यालय परिसरको खाली जग्गामा खाल्डो खनेर पुरिएको छ। तिहारका बेला सीमाबाट हुने अवैध ओसारपसार रोक्न सुरक्षा निकायले निगरानी कडा पारेको छ।

यसैबीच फ्लोरिकल्चर एसोसिएसन नेपालले यस वर्ष तिहारभर देशभर करिब ६४ करोड ५० लाख रुपैयाँको फूल कारोबार हुने अनुमान गरेको छ। आइतबार लक्ष्मीपूजाका दिन काठमाडौं उपत्यकामा सयपत्री र भाइटीकाका लागि मखमली फूल किन्नेको भीड लागेको थियो। काठमाडौं महानगरपालिकाले फूल खरिदबिक्रीका लागि विभिन्न स्थान तोकेर विशेष व्यवस्था मिलाएको छ।

एसोसिएसनका अनुसार देशभर ३२५ हेक्टरभन्दा बढी क्षेत्रमा व्यावसायिक फूलखेती भइरहेको छ र यस क्षेत्रमा करिब साढे ११ अर्ब रुपैयाँ लगानी पुगेको अनुमान छ।