भोटेकोशी–रसुवा बाढी: ऊर्जा क्षेत्रमा करिब डेढ खर्ब क्षति, वित्तीय पुनर्स्थापनामा करिब ६५ अर्ब

गत भदौ १० गते भोटेकोशीमा आएको बाढीले ऊर्जा क्षेत्रमा करिब १ खर्ब ३३ अर्ब रुपैयाँ बराबरको क्षति पुर्‍याएको राष्ट्रिय योजना आयोगको प्रारम्भिक मूल्याङ्कनले देखाएको छ। आयोगको विपद्पछिको आवश्यकता मूल्याङ्कनअनुसार रसुवा र नुवाकोटका १४ जलविद्युत् आयोजना, ६ सबस्टेसन तथा प्रसारण र वितरण लाइनमा क्षति पुगेको छ। प्रभावित आयोजनामध्ये आधा निजी क्षेत्रका र आधा नेपाल विद्युत् प्राधिकरण तथा मातहतका कम्पनीका छन्।

ऊर्जा क्षेत्र पुनरुत्थानका लागि करिब २ खर्ब १९ अर्ब रुपैयाँ आवश्यक पर्ने आयोगको अनुमान छ। ऊर्जा मन्त्रालयका प्रवक्ता मोहनकुमार शाक्यका अनुसार आयोजना पुनर्निर्माण र पुनः डिजाइनबारे छलफल जारी छ। स्वतन्त्र ऊर्जा उत्पादकहरूको संस्था इप्पानका सचिव विजयमोहन भट्टराईले ऋण पुनर्संरचना, थप समय र सहुलियतसहितको विशेष प्याकेज आवश्यक रहेको बताउनुभएको छ।

वित्तीय क्षेत्र पुनर्स्थापनामा करिब ६५ अर्ब रुपैयाँ लाग्ने आयोगको आकलन छ। नेपाल बैंकर्स संघका अनुसार बाढी क्षेत्रमा रहेका १२ बैंकका १७ शाखामध्ये १५ शाखा पूर्ण रूपमा क्षतिग्रस्त भएका छन्। ती शाखामा करिब ७८ हजार निक्षेपकर्ता, करिब ४ अर्ब ५० करोड रुपैयाँ निक्षेप र करिब २ अर्ब ४३ करोड रुपैयाँ कर्जा रहेको संघले जनाएको छ।