मध्यावधि हारपछि ट्रम्प: सेयर बजारले ठूलो क्षति बेहोर्‍यो, बलियो भएर फर्कन्छौँ

अमेरिकी राष्ट्रपति डोनाल्ड ट्रम्पले मध्यावधि निर्वाचनको नतिजाले अमेरिकालाई इतिहासमै ठूलो प्रतिगमनतर्फ धकेलेको बताउनुभएको छ। आइतबार आफ्नो सामाजिक सञ्जाल ट्रुथ सोसलमा उहाँले अमेरिकीलाई नडराउन भन्दै पहिलेभन्दा ठूलो र बलियो भएर फर्कने प्रतिबद्धता जनाउनुभएको छ। ट्रम्पको दाबीअनुसार डेमोक्र्याटहरूले राम्रो प्रदर्शन गरेको खबरपछि अमेरिकी सेयर बजारले एकै दिन करिब ३० खर्ब डलर बराबरको मूल्य गुमाएको छ।

तर बजार गिरावटको कारण चुनावी नतिजा मात्र नभई प्रविधि र एआई क्षेत्रको लगानीसम्बन्धी चिन्ता पनि रहेको बताइएको छ। शुक्रबार फ्लोरिडामा पत्रकारसँग कुरा गर्दै उहाँले बजार गिरावटलाई इरानलाई आणविक हतियार राख्न नदिने अमेरिकी नीतिसँग पनि जोड्नुभएको थियो। गत मङ्गलबारको निर्वाचनमा डेमोक्र्याटहरूले कंग्रेसका दुवै सदन कब्जा गरेका छन्।

रिपब्लिकन पार्टीले दशकौँदेखि प्रभुत्व जमाएका राज्यहरूमा पनि ठूलो क्षति बेहोरेको छ। रिपब्लिकन सांसदहरूले हारको दोष राष्ट्रपतिलाई दिइरहेका बेला ट्रम्पले शुक्रबार कट्टरपन्थी सल्लाहकार स्टिफन मिलरलाई नयाँ चिफ अफ स्टाफ बनाउनुभएको छ। यसलाई ट्रम्प झनै कडा बाटोमा अघि बढ्ने र पछि नहट्ने सङ्केतका रूपमा हेरिएको छ।