तिहार बिदामा मुस्ताङ र मर्दीमा पर्यटक बढे

तिहारको लामो सरकारी बिदासँगै हिमाली जिल्ला मुस्ताङ र कास्कीको मर्दी हिमाल पदमार्गमा पर्यटकको चाप बढेको छ। जिल्ला प्रहरी कार्यालय मुस्ताङका अनुसार कात्तिक १ देखि १५ गतेसम्म करिब ३५ हजार ९ सय पर्यटक मुस्ताङ पुगेका छन्। तीमध्ये करिब २७ हजार १ सय स्वदेशी र झन्डै ८ हजार ८ सय विदेशी छन्।

दसैँताका भारी वर्षा, हिमपात, हिमपहिरो र आँधीको पूर्वानुमानले अपेक्षाअनुसार पर्यटक आएका थिएनन्, तर मौसम अनुकूल बनेपछि आगमन बढेको प्रहरीले जनाएको छ। प्रहरी निरीक्षक एवं सूचना अधिकारी सन्तोष बस्यालका अनुसार विद्यालय, कलेज, सरकारी र गैरसरकारी कार्यालय, बैंक तथा सहकारीका समूह घुम्न आउने गरेका छन्। अधिकांश पर्यटक मुक्तिनाथ मन्दिर दर्शनपछि लोमान्थाङ, कागबेनी, मार्फा र उत्तरी कोरला नाकासम्म पुगेका छन्।

छठसम्म सरकारी बिदा रहने भएकाले पर्यटक आउने क्रम जारी रहने व्यवसायीहरूको अपेक्षा छ। यता पोखरा नजिकैको मर्दी हिमाल पदमार्गमा दैनिक करिब ६ सयदेखि ७ सय पर्यटक पदयात्रामा जाने गरेका छन्। एउटै पदमार्गबाट धेरै हिमचुचुरा देखिने र तुलनात्मक रूपमा कम जोखिम हुने भएकाले यो गन्तव्य रोजाइमा परेको हो।

मर्दी हिमाल ट्रेक व्यवस्थापन समितिका अध्यक्ष राजकुमार तामाङका अनुसार असोजदेखि नै चाप बढेपछि होटलमा कोठा मिलाउन कठिन भएको छ।