दीप र रङ्गोलीसँग देशभर लक्ष्मीपूजा, झिलिमिली उपत्यका

तिहारको तेस्रो दिन आइतबार साँझ देशभर घर, पसल र कार्यालयमा धनधान्यकी देवी लक्ष्मीको पूजा गरिएको छ। कात्तिक कृष्ण औँसीको यो रातलाई सुखरात्रि पनि भनिन्छ, जुन वर्षका चार प्रमुख रात्रिमध्ये एक हो। सफा र लिपपोत गरिएको घरमा लक्ष्मीको बास हुने मान्यताअनुसार बिहानै घरआँगन सफा गरी गाईको गोबर र रातोमाटोले लिपिएको थियो।

साँझ मूलढोकादेखि पूजाकोठासम्म चामलको पिठो र अबिरले लक्ष्मीको पाइला कोरिएको छ। आँगन र ढोकामा रङ्गोली बनाइएको छ भने सयपत्री, मखमली र गोदावरीका मालाले घर सजाइएका छन्। पूजापछि घरको गेट र मूलढोका खुला राख्ने चलन छ।

काठमाडौँको दरबारमार्ग क्षेत्रका पसलका ढोका पनि रङ्गोलीले सजिएका छन्। धरहरा, स्वयम्भू, न्युरोड, महाबौद्ध, नयाँ बानेश्वर र कोटेश्वर क्षेत्र बत्तीले जगमगाएका छन्। घरघरमा बालिएका दियो, पाला र बिजुलीका बत्तीले उपत्यका सुन्दर देखिएको छ।

कीर्तिपुर, चन्द्रागिरि र तारकेश्वरको काभ्रेस्थलीबाट उपत्यकाको झिलिमिली दृश्य देखिएको छ। न्युरोड, असन र इन्द्रचोकमा तिहारका सामग्री किन्नेको चहलपहल बढेको छ। म्याग्दीको सदरमुकाम बेनी बजार पनि दीप र बत्तीले उज्यालो भएको छ।

सिरहा र कपिलवस्तुका आँगन रङ्गीचङ्गी रङ्गोलीले सजिएका छन्। झिलिमिली बत्तीको यो सजावट भाइटीका र छठसम्म रहने छ।