लक्ष्मीपूजामा बिजुलीको माग १ हजार ८१३ मेगावाट, नयाँ रेकर्ड; ५८७ मेगावाट निर्यात

लक्ष्मीपूजाको साँझ देशभर बिजुलीको माग करिब १ हजार ८१३ मेगावाट पुगेको नेपाल विद्युत् प्राधिकरणले जनाएको छ। आइतबार साँझ ६ बजेर १५ मिनेटमा राष्ट्रिय प्रणालीमा माग उच्च बिन्दुमा पुगेको थियो। त्यस बेला देशभित्र करिब २ हजार ४०० मेगावाट बिजुली उत्पादन भइरहेको थियो।

आन्तरिक माग धानेर बचेको करिब ५८७ मेगावाट भारततर्फ निर्यात गरिएको थियो। प्राधिकरणका अनुसार गत वर्षको लक्ष्मीपूजामा माग करिब १ हजार ७४५ मेगावाट थियो। यस वर्ष करिब ६८ मेगावाट बढी माग भएको छ।

काठमाडौँ उपत्यकाको माग पनि गत वर्षको करिब ४०२ मेगावाटबाट बढेर करिब ४८९ मेगावाट पुगेको छ। कुल उत्पादनमध्ये सबैभन्दा धेरै, करिब १ हजार ५३६ मेगावाट, निजी क्षेत्रका आयोजनाबाट आएको थियो। सो अवधिमा भारतबाट बिजुली आयात गर्नुपरेन र प्रणालीमा आपूर्ति अवरोध शून्य रहेको प्राधिकरणले उल्लेख गरेको छ।

प्राकृतिक विपद्ले उत्पादन र प्रसारण प्रणालीमा क्षति पुर्‍याएको अवस्थामा पनि माग धानिएको प्राधिकरणले जनाएको छ। ऊर्जा, जलस्रोत तथा सिँचाइमन्त्री विराजभक्त श्रेष्ठले स्युचाटारस्थित भार प्रेषण केन्द्र पुगेर आपूर्तिको अवस्थाबारे जानकारी लिनुभएको छ। मन्त्री श्रेष्ठले कठिन अवस्थामा माग धान्न सकिनुलाई सकारात्मक उपलब्धि भन्दै कर्मचारी, व्यवस्थापन र उपभोक्तालाई धन्यवाद दिनुभएको छ।