पुल: धुलिखेलको सुन्डीखोलामा १७ महिनामै सम्पन्न, गण्डीगाडमा १६ महिनादेखि अलपत्र

काभ्रेपलाञ्चोकको धुलिखेल नगरपालिका–१० स्थित सुन्डीखोलामा १७ महिनामै पक्की पुल बनेर सञ्चालनमा आएको छ भने अछाम र डोटीको सिमानामा रहेको गण्डीगाडको पुल सम्झौता भएको १६ महिनापछि पनि अघि बढेको छैन। पूर्वाधार विकास कार्यालय धुलिखेलका लेखा प्रमुख केशव पोखरेलका अनुसार सुन्डीखोलाको पुल करिब १ करोड ७९ लाख रुपैयाँ लागतमा सम्झौताको अवधिभित्रै सम्पन्न भएको हो। रोशी गाउँपालिका–२ को एम/एस लामा प्रगति निर्माण सेवाले निर्माणको ठेक्का पाएको थियो।

वडाध्यक्ष गोविन्दप्रसाद भण्डारीले सवारी चाप बढ्दै गएकाले पुल बनाइएको बताउनुभएको छ। पुल बनेपछि एम्बुलेन्सलगायत आपत्कालीन सेवा र कृषि उपज बजार पुर्‍याउन सहज भएको उहाँको भनाइ छ। अर्कातर्फ, पूर्वाधार विकास कार्यालय साँफेबगरले अछामको चौरपाटी गाउँपालिका–२ सोकट र डोटीको दिपायल सिलगढी नगरपालिका–८ जोड्ने ४० मिटर लामो पुलका लागि करिब ५ करोड २१ लाख रुपैयाँमा ठेक्का सम्झौता गरेको थियो।

धनगढी–५ को एसएसएनएस सीपीसीएस–एसी जेभीले उक्त ठेक्का पाएको हो। पहुँचमार्ग खन्ने क्रममा डोजरले खसालेको ढुङ्गाले पुरानो झोलुङ्गे पुलसमेत क्षतिग्रस्त भएको छ। स्थानीय बासिन्दा दैनिकजसो त्यही जीर्ण पुल तर्न बाध्य छन्।

चौरपाटीका अध्यक्ष भीमबहादुर साउदले पटकपटक ताकेता गर्दा पनि कार्यालयले चासो नदिएको आरोप लगाउनुभएको छ।