एसियाडमा नेपाल: कबड्डी, महिला भलिबल र टेबलटेनिसमा पराजय

जापानमा जारी २०औँ एसियाली खेलकुदमा सोमबार नेपाल पुरुष कबड्डी, महिला भलिबल र महिला टेबलटेनिसमा पराजित भएको छ। तोकाइ सिटिजन जिम्न्याजियममा भएको पहिलो खेलमा थाइल्यान्डले नेपाली कबड्डी टोलीलाई ५९–४८ अंकले हराएको छ। विश्रामसम्म थाइल्यान्ड २८–२४ ले अगाडि थियो।

उत्तरार्धमा थाइल्यान्डले ३१ अंक बटुल्दा नेपाल २४ अंकमा सीमित भएको थियो। नेपालले २९ रेड अंक, १८ बोनस अंक र एउटा सुपर अंक जोडेको थियो। भारतमा व्यावसायिक लिग खेलिसकेका घनश्याम रोकामगर टोलीका कप्तान हुन् भने विष्णुदत्त भट्ट मुख्य प्रशिक्षक हुन्।

महिला भलिबलतर्फ ओकाजाकी सेन्ट्रल पार्क जनरल जिम्नेसियममा भएको वर्गीकरण खेलमा हङकङले नेपाललाई सोझो सेटमा ३–० ले हराएको छ। हङकङले पहिलो सेट २५–२० र दोस्रो २५–१९ ले जितेपछि तेस्रो सेट २८–२६ ले आफ्नो बनाएको थियो। नेपालले अब ११औँ स्थानका लागि फिलिपिन्स र मङ्गोलियाबीचको खेलमा हार्ने टोलीसँग खेल्नेछ।

टेबलटेनिसमा स्काई हल टोयोटामा मकाउसँग ३–१ ले हारेपछि इभाना थापा, योङ्गी पौडेल र नविता श्रेष्ठ रहेको नेपाली टोली महिला टोलीगत स्पर्धाबाट बाहिरिएको छ। समूह 'ए' मा रहेको नेपाल आइतबार चीनसँग ३–० ले पराजित भएको थियो। अब यी खेलाडी एकल स्पर्धामा खेल्नेछन्।