दसैँ बिदामा पनि निगमका डिपो र पेट्रोल पम्प खुला

नेपाल आयल निगमले दसैँको सार्वजनिक बिदामा पनि पेट्रोल पम्पबाट इन्धन बिक्री जारी राख्ने जनाएको छ। काठमाडौँ उपत्यकासहित विभिन्न प्रदेश र जिल्लामा रहेका डिपो तथा पम्प आलोपालो गरी खुला राखिनेछन्। निगमका अनुसार दसैँको टीका र एकादशीको दिनबाहेक अन्य दिनमा डिपोहरू तोकिएको तालिकाअनुसार खुला रहनेछन्।

निगमले सातै प्रदेशका डिपोका लागि छुट्टाछुट्टै मिति तोकेको छ। कात्तिक १ गते काठमाडौँको थानकोट, मधेशको अमलेखगन्ज, गण्डकीको पोखरा र लुम्बिनीको भैरहवा डिपो खुला रहनेछन्। कोशीको विराटनगर, कर्णालीको सुर्खेत र सुदूरपश्चिम डिपो भने त्यस दिन खुला रहने सूचीमा छैनन्।

कात्तिक २ गते सातै प्रदेशका सबै सूचीकृत डिपो एकसाथ सञ्चालनमा रहनेछन्। कात्तिक ६ गते थानकोट, विराटनगर, अमलेखगन्ज, पोखरा र भैरहवा डिपो खुला रहनेछन्। कात्तिक ७ गते उपत्यकाको थानकोट, कर्णालीको सुर्खेत र सुदूरपश्चिम डिपोबाट मात्र इन्धन उपलब्ध हुनेछ।

कात्तिक ८ गते कोशीको विराटनगर, मधेशको अमलेखगन्ज र लुम्बिनीको भैरहवा डिपो सञ्चालनमा रहनेछन्। थानकोट, अमलेखगन्ज र भैरहवा डिपो चार–चार दिन, विराटनगर र पोखरा तीन–तीन दिन तथा सुर्खेत र सुदूरपश्चिम दुई–दुई दिन खुला रहनेछन्।