अब वर्षभरि सहुलियत पसल, चाडपर्वमा उपभोक्ताको चाप

चाडपर्वका बेला मात्र खुल्ने गरेका सहुलियत मूल्य पसल अब वर्षैभरि सञ्चालन हुने भएका छन्। उद्योग, वाणिज्य तथा आपूर्ति मन्त्रालय मातहतको खाद्य व्यवस्था तथा व्यापार कम्पनी लिमिटेडले वर्षैभरि यस्ता पसल चलाउने कार्यक्रम लागू गरेको जनाएको छ। कम्पनीका अनुसार देशका करिब ४४ जिल्लाका झन्डै १९३ स्थानबाट दैनिक उपभोग्य वस्तु सहुलियत मूल्यमा बिक्री भइरहेको छ।

चामल, दाल, खानेतेल, चिनी, नुन, पिठो र रैथाने बालीमा प्रतिकिलो वा प्रतिलिटर करिब पाँचदेखि सात रुपैयाँसम्म छुट दिइएको छ। दैनिक उपभोग्य वस्तुको मूल्यवृद्धिबाट उपभोक्तालाई राहत दिने उद्देश्यले यी पसल सञ्चालनमा ल्याइएका हुन्। साल्ट ट्रेडिङ कर्पोरेसनले काठमाडौँ उपत्यकाभित्र करिब १३ स्टल र तीन घुम्ती भ्यान तथा उपत्यकाबाहिर झन्डै २५ स्थानसहित करिब ३८ बिक्री केन्द्रबाट छुटमा खाद्यवस्तु उपलब्ध गराइरहेको छ।

दसैँ, तिहार र छठ लक्षित गरी बागलुङ बजारको उपल्लाचौरमा खुलेको सुपथ मूल्य पसलमा उपभोक्ताको चाप बढेको छ। त्यहाँ नुन, चिनी, तोरीको तेल, आँटा र मैदा बजार मूल्यभन्दा सस्तोमा पाइने र दैनिक करिब पाँच सय जनालाई सेवा दिन सकिने जनाइएको छ। सोमबारदेखि खुलेको उक्त पसल कात्तिक ३० गतेसम्म सञ्चालनमा रहनेछ।

यसपालि सरकारले दसैँमा खसी, बोका र च्याङ्ग्रा भने सहुलियत मूल्यमा बिक्री नगर्ने भएको छ।