इटहरीमा असोज १४ देखि २० सम्म सीप तथा रोजगार मेला

युवा, श्रम तथा रोजगार मन्त्रालयले सुनसरीको इटहरीमा ‘सीप तथा रोजगार मेला, २०८३’ आयोजना गर्ने भएको छ। मन्त्रालयका अनुसार कोशी प्रदेशमा हुने यो मेला असोज १४ गतेदेखि २० गतेसम्म सात दिन चल्नेछ। बुधबार सिंहदरबारमा पत्रकार सम्मेलन गर्दै मन्त्रालयले सरकारले घोषणा गरेको रोजगार दशकलाई अघि बढाउन ‘सीप र रोजगारी : साझा जिम्मेवारी’ नाराका साथ मेला सुरु हुने जनाएको छ।

उद्योग, सेवा, कृषि र निर्माणलगायत करिब १० विधामा झन्डै ६५ स्टल रहने मन्त्रालयको भनाइ छ। माग, सीप तालिम र रोजगारीलाई एउटै प्रणालीमा जोड्ने अवधारणाअनुसार तयार गरिएको यो मेला अन्य प्रदेशमा पनि आयोजना हुने युवा, श्रम तथा रोजगारमन्त्री रामजी यादवले बताएका छन्। रोजगारदाता र कामदारबीचको मिसम्याच हटाउन ‘जब म्याचिङ’ प्रणालीलाई प्रभावकारी बनाइने र चालु आर्थिक वर्ष करिब एक लाख व्यक्तिलाई रोजगारीमा जोड्ने लक्ष्य रहेको उनको भनाइ छ।

मन्त्रालयका सहसचिव एवं मेला संयोजक हेमराज तामाङका अनुसार सातै प्रदेश समेट्ने गरी सात चरणमा मेला हुनेछ। सीप विकास र रोजगारी प्रवर्द्धनका लागि यसलाई राष्ट्रिय अभियानका रूपमा सञ्चालन गरिने तामाङले बताएका छन्। वैदेशिक रोजगारीलाई बाध्यताबाट विकल्पमा रूपान्तरण गर्दै स्वदेशमै अवसर सिर्जना गर्नु मेलाको मुख्य उद्देश्य हो।