आज र भोलि पहाडी भेगमा मेघगर्जनसहित वर्षा, केही ठाउँमा भारी वर्षाको सम्भावना

जल तथा मौसम विज्ञान विभागले आज र भोलि देशका पहाडी भेगमा मेघगर्जन र चट्याङसहित वर्षा हुने पूर्वानुमान गरेको छ। विभागका अनुसार अहिले देशमा पश्चिमी न्यून चापीय प्रणाली र मनसुनी वायु दुवैको प्रभाव छ। आज बागमती र सुदूरपश्चिम प्रदेशका पहाडी क्षेत्रका एक-दुई स्थानमा भारी वर्षा हुन सक्ने विभागले जनाएको छ।

हिमाली भेगका एक-दुई ठाउँमा मध्यमसम्मको वर्षा वा हिमपात हुने सम्भावना छ। भोलि लुम्बिनी र सुदूरपश्चिमका पहाडी तथा तराई भेग र बागमती, गण्डकी र कर्णालीका पहाडी भेगका एक-दुई स्थानमा भारी वर्षा हुन सक्छ। भोलि हिमाली भेगका थोरै र पहाडी भेगका केही स्थानमा हावाहुरी र असिनासहित वर्षा हुने सम्भावना छ।

लुम्बिनी र सुदूरपश्चिमको तराईका केही स्थानमा पनि भोलि मेघगर्जनसहित वर्षा हुन सक्छ। प्रमुख सहरमध्ये काठमाडौँमा तापक्रम १६ देखि १८ डिग्री सेल्सियस र वर्षाको सम्भावना ३० प्रतिशत छ। पोखरामा १९ देखि २१ डिग्री र वर्षाको सम्भावना ४० प्रतिशत छ।

वीरेन्द्रनगरमा १८ देखि २० डिग्री तापक्रम र २० प्रतिशत वर्षाको सम्भावना छ। यी तीनै सहरमा मेघगर्जनसहित मध्यम वर्षा हुन सक्छ। विराटनगर, जनकपुर र नेपालगञ्जमा भने वर्षाको सम्भावना छैन र बिहान कुहिरो लाग्नेछ।

विराटनगरमा २३ देखि २५, जनकपुरमा २२ देखि २४ र नेपालगञ्जमा २१ देखि २३ डिग्री सेल्सियस तापक्रम रहने विभागले जनाएको छ।