कोशी, बागमती र सुदूरपश्चिमका केही स्थानमा आज भारी वर्षाको सम्भावना, सतर्कता अपनाउन आग्रह

पश्चिमी न्यून चापीय प्रणाली र मनसुनी वायुको प्रभावका कारण आज (शुक्रबार) देशका विभिन्न स्थानमा मेघगर्जन, चट्याङ, हावाहुरी र असिनासहित वर्षा तथा हिमपातको सम्भावना रहेको मौसम पूर्वानुमान महाशाखाले जनाएको छ।

महाशाखाका अनुसार कोशी, बागमती र सुदूरपश्चिम प्रदेशका केही स्थानमा भारी वर्षा हुन सक्छ। केही स्थानमा छोटो समय भारी वर्षा हुन सक्ने भएकाले महाशाखाले सर्वसाधारणलाई सतर्क रहन आग्रह गरेको छ।

गएराति गण्डकी र बागमती प्रदेशका पहाडी भूभागका केही ठाउँमा हल्का वर्षा भएको थियो भने पश्चिमका एक–दुई ठाउँमा छिटपुट पानी परेको थियो।

वायुमण्डल अझै अस्थिर रहेकाले शनिबारसम्म केही ठाउँमा मेघगर्जन, चट्याङ र असिनासहित वर्षाको सम्भावना रहेको मौसमविद्ले बताएका छन्।