विश्वकर्मा पूजामा चुरियामाई मन्दिरमा घुइँचो लागेको छ। नयाँ सवारीसाधन किन्नेहरू पूजा गर्न पुगेका छन्। हेटौँडा आसपासका भक्तजनको भीड बढेको छ।

विश्वकर्मा पूजाको अवसरमा मकवानपुरको चुरियामाई मन्दिरमा दर्शनार्थीको घुइँचो लागेको छ। नयाँ सवारीसाधन खरिद गरेपछि यस मन्दिरमा ल्याएर पूजा गर्ने पुरानो परम्परा रहेको छ। पूर्व–पश्चिम राजमार्गअन्तर्गत हेटौँडाबाट वीरगन्ज जाने सडकखण्डको चुरे पर्वत शृङ्खलामा यो मन्दिर अवस्थित छ।

यातायातकी देवीका रूपमा चुरियामाईको विशेष पूजाआजा गरिने मन्दिरका पुजारी दीलिप नगरकोटीले बताउनुभएको छ। नयाँ सवारीसाधनको पूजा गर्दा सधैँ शुभ हुने जनविश्वास रहेको छ। चुरे पर्वत शृङ्खलामा रहेकाले यसको चुरियामाई नामकरण गरिएको स्थानीय ज्येष्ठ नागरिकले बताएका छन्।