धनगढीमा सार्वजनिक स्थलको नाम परिवर्तन गर्न रोक लगाइएको छ। उपमहानगरपालिकाले जथाभावी नामकरण गर्न प्रतिबन्ध लगाएको हो। पुराना नाम संरक्षण गरिनेछ।

धनगढी उपमहानगरपालिकाले टोल, चोक, मार्ग तथा सार्वजनिक स्थलको आधिकारिक नाम जथाभावी परिवर्तन गर्न रोक लगाएको छ। उपमहानगरपालिका क्षेत्रभित्रका पुराना तथा प्रचलित नाम विभिन्न व्यक्ति, समूह वा संस्थाले आफ्नो अनुकूल परिवर्तन गर्ने गुनासो आएपछि वडा कार्यालयलाई कडाइ गर्न निर्देशन दिइएको हो। प्रशासकीय अधिकृत सुरेन्द्रसिंह कार्कीले सबै वडा कार्यालयलाई पत्र पठाउँदै सार्वजनिक स्थलको नाम परिवर्तन वा नयाँ नामकरण गर्दा तोकिएको प्रक्रिया अनिवार्य रूपमा पालना गर्न निर्देशन दिनुभएको छ।

स्थानीय सरकार सञ्चालन ऐनबमोजिम सार्वजनिक स्थलको लगत अद्यावधिक तथा संरक्षण गर्ने अधिकार स्थानीय तहलाई रहेको छ।