बेनी–जोमसोम सडक खण्डको स्तरोन्नति तीव्र पारिएको छ। पहिरो प्रभावित क्षेत्रमा मर्मत भइरहेको छ। कालीगण्डकी करिडोरअन्तर्गतको सडक सुधार गरिएको हो।

चीन र भारत जोड्ने कालीगण्डकी करिडोरअन्तर्गत बेनी–जोमसोम–कोरला सडकको म्याग्दी खण्डमा स्तरोन्नतिको काम तीव्र पारिएको छ। बेनी–जोमसोम–कोरला सडक योजना कार्यालयले म्याग्दीको गलेश्वरदेखि मुस्ताङको लेते–सेतोखोलासम्म पहिरो प्रभावित क्षेत्रमा मर्मत अघि बढाएको हो। विभिन्न प्याकेजमा ठेक्का लगाएर पहिरो नियन्त्रण, नदी कटान रोकथाम, टेवा पर्खाल निर्माण तथा सडक ढलानको काम भइरहेको छ।

बर्खायाम र कोरला नाकातर्फ आवतजावत गर्ने सवारीसाधनको चापका बीच पनि निर्माणलाई निरन्तरता दिइएको छ। यसअघि ठेक्काबाट हटाइएको पहिरो प्रभावित क्षेत्रमा अहिले काम भइरहेको र बाँकी जोखिमयुक्त क्षेत्रमा पनि ठेक्का लगाउने तयारी भइरहेको छ। कमजोर भू–बनोटका कारण म्याग्दी खण्डमा बर्खायाममा बाढीपहिरोले यातायात अवरुद्ध हुने समस्या रहेकाले सडक स्तरोन्नति र पहिरो नियन्त्रणलाई प्राथमिकतामा राखिएको छ।