त्रिभुवन विश्वविद्यालयको स्थगित परीक्षा सञ्चालन हुने भएको छ। बाढीका कारण परीक्षा रोकिएको थियो। आउँदो असोज ६ गतेदेखि परीक्षा सुरु हुनेछ।

बाढीका कारण स्थगित भएको त्रिभुवन विश्वविद्यालयको परीक्षा आउँदो असोज ६ गतेदेखि सञ्चालन हुने भएको छ। त्रिभुवन विश्वविद्यालय परीक्षा नियन्त्रण कार्यालयले सूचना जारी गर्दै परीक्षासम्बन्धी नयाँ तालिका सार्वजनिक गरेको छ। थाहाखबरका अनुसार प्राकृतिक विपत्ति तथा भोटेकोशी बाढीका कारण गत भदौ करिब १५ गतेदेखि सञ्चालन हुने विभिन्न संकायका परीक्षाहरू रोकिएका थिए।

स्नातक तहका बीए, बीएड, बीबीए र बीएससीका पूर्व प्रकाशित परीक्षा केन्द्रहरूमध्ये करिब ३ वटा केन्द्रको परीक्षा स्थगित गरिएको थियो। नुवाकोटको आदर्श बहुमुखी क्याम्पस, धादिङको श्री नीलकण्ठ बहुमुखी क्याम्पस र रसुवाको कालिकास्थानस्थित कालिका हिमालय क्याम्पस केन्द्रमा सञ्चालन हुने परीक्षाहरू रोकिएका थिए। विश्वविद्यालयले उक्त स्थगित परीक्षाहरू असोज ६ गतेदेखि पूर्व निर्धारित परीक्षा केन्द्रहरूमै सञ्चालन हुने जनाएको छ।

सम्बन्धित सबै परीक्षार्थीलाई तोकिएको समय र केन्द्रमा उपस्थित भई परीक्षामा सहभागी हुन परीक्षा नियन्त्रण कार्यालयले आग्रह गरेको छ।