कांग्रेस काठमाडौं महानगर अधिवेशन सुरु, बुटवलमा दुई प्यानल

नेपाली कांग्रेसको १५औँ महाधिवेशनअन्तर्गत विभिन्न तहका अधिवेशन देशभर जारी छन्। काठमाडौं महानगर समितिको अधिवेशन भृकुटीमण्डपस्थित राष्ट्रिय सभागृहमा महामन्त्री प्रदीप पौडेलको प्रमुख आतिथ्यतामा सुरु भएको छ। बुटवल उपमहानगर समितिको नयाँ नेतृत्व चयनका लागि दुई प्यानल प्रतिस्पर्धामा उत्रिएका छन्।

वर्तमान उपसभापति ज्योति भण्डारी र जितबहादुर मल्लले छुट्टाछुट्टै प्यानल बनाएर सभापतिमा प्रतिस्पर्धा गरिरहनुभएको छ। भण्डारी नेतृत्वको प्यानलबाट उपसभापतिमा गणेश घिमिरे, महिला उपसभापतिमा गंगा पन्थी, सचिवमा अर्जुन गिरी र सहसचिवमा नारायण खनाल उम्मेदवार हुनुहुन्छ। मल्ल नेतृत्वको प्यानलबाट पनि उपसभापतिलगायत पदमा उम्मेदवार मैदानमा छन्।

अधिवेशन उद्घाटन गर्दै नेता बालकृष्ण खाणले सहमति वा मैत्रीपूर्ण प्रतिस्पर्धाबाट नेतृत्व चयन गर्न कार्यकर्तालाई आग्रह गर्नुभएको छ। खाणले कांग्रेस ऐतिहासिक रूपमै युवाको पार्टी रहेको उल्लेख गर्दै बीपी कोइराला गृहमन्त्री हुँदा र कृष्णप्रसाद भट्टराई पहिलो सभामुख हुँदा युवा अवस्थामै रहेको स्मरण गराउनुभएको छ। रोल्पामा जिल्ला निर्वाचन अधिकृत सुदीप गौतमका अनुसार ७२ मध्ये ६९ वडामा वडा अधिवेशन सम्पन्न भएका छन्।

ती वडाबाट वडा अध्यक्षसहित २४ क्षेत्रीय प्रतिनिधि निर्विरोध चयन भएका छन् भने तीन वडामा अधिवेशन हुन सकेको छैन।