संसद्मा महँगी र बाढीपीडितको पुनर्स्थापनाबारे सांसदको ध्यानाकर्षण

प्रतिनिधिसभाको बुधबारको बैठकको शून्य समयमा सांसदहरूले बढ्दो महँगी, भोटेकोशी बाढी प्रभावितको पुनःस्थापना र सडक सुरक्षाका विषयमा सरकारको ध्यानाकर्षण गराएका छन्।

नेपाली कम्युनिस्ट पार्टीकी सांसद बलावती शर्माले दसैं–तिहारको मुखमा तरकारी र मासुको मूल्य अस्वाभाविक रूपमा बढेको बताउनुभएको छ। मूल्यवृद्धिबारे प्रश्न गर्दा सरकारले बाह्य कारण देखाएर पन्छिने गरेको उहाँको आरोप छ। भीषण वर्षाको पूर्वानुमानबीच नागरिकलाई सुरक्षित राख्ने पूर्वतयारीबारे पनि उहाँले प्रश्न गर्नुभयो। दैनिक उपभोग्य वस्तुको सहज आपूर्ति सुनिश्चित गर्दै महँगी नियन्त्रणमा पहल गर्न उहाँले सरकारसँग आग्रह गर्नुभयो।

राष्ट्रिय स्वतन्त्र पार्टीका बुद्धरत्न महर्जनले विपद् प्रभावित परिवार अझै टहरामा बस्न बाध्य रहेको भन्दै एकमुष्ट राहत तथा पुनःस्थापना प्याकेज घोषणा गर्न माग गर्नुभयो। सबै विपद् प्रभावितका लागि स्थायी संरचना निर्माण गर्नुपर्नेमा उहाँको जोड छ। सोही दलका बुद्धिप्रसाद पन्तले साना तथा अन्य सञ्चारमाध्यमलाई लोककल्याणकारी विज्ञापन उपलब्ध गराउन र पत्रकारका जायज माग सम्बोधन गर्न ध्यानाकर्षण गराउनुभयो।

रास्वपाकी बीना गुरुङले भोटेकोशी बाढी प्रभावित बालबालिकाको पठनपाठन निरन्तरताका लागि राज्यले ध्यान दिनुपर्ने बताउनुभयो।

नेकपाका रमेश मल्लले भोटेकोशी बाढीलाई जलवायु न्यायसँग जोड्दै रसुवा–भोटेकोशीलगायत प्रभावित क्षेत्रको मानवीय, भौतिक र पर्यावरणीय क्षतिको अन्तर्राष्ट्रिय सहयोगमा स्वतन्त्र मूल्याङ्कन गर्न माग गर्नुभयो। नेकपाकी भीमकुमारी बुढामगरले पुनर्निर्माणमा युवा शक्तिलाई जनश्रमदानमार्फत परिचालन गर्नुपर्नेमा जोड दिनुभयो।