बेनी–जोमसोम सडक खुलेपछि मुस्ताङको स्याउ बजारतर्फ

बाढीपहिरो र नदी कटानका कारण १५ दिनदेखि बन्द बेनी–जोमसोम सडक खुलेपछि मुस्ताङका किसानले बगैँचामा रोकिएको स्याउ बजार पठाउन सुरु गरेका छन्। असोज ८ देखि ११ गतेसम्मको वर्षापछि आएको बाढीले बेनी–जोमसोम–कोरला सडकका करिब ४६ ठाउँमा क्षति पुर्‍याएको थियो। हरेक वर्ष दशैँभन्दा झन्डै तीन साताअघि बजार पुग्ने स्याउ यसपटक बोटमै अड्किएको थियो।

थासाङ, घरपझोङ र बारागुङ मुक्तिक्षेत्रका बगैँचामा बिहीबारदेखि स्याउ टिपाइ सुरु भएको छ। रेड डेलिसियस जात भदौ १४ र स्थानीय जात भदौ २२ गतेदेखि टिप्ने तालिका बने पनि तीजमा बेचिएबाहेक धेरैजसो फल बोटमै थियो। टुकुचेका किसान निरज तुलाचनले करिब ५५ रोपनीबाट गाला, किङरोड र गोल्डेन जातका स्याउ बेचिसकेपछि स्थानीय जात टिप्ने बेलामा सडक अवरुद्ध भएको बताउनुभएको छ।

बारागुङ मुक्तिक्षेत्र–४ का आङ्ग्या गुरुङले शुक्रबार र शनिबार गरी तीन ट्रक स्याउ काठमाडौँ पठाउनुभएको छ। चिसो हावापानीका कारण ढिलो भए पनि गुणस्तर नघटेको उहाँको भनाइ छ। करिब एक सय किसानले बाँकी स्याउ फूलपातीसम्म बजार पुर्‍याउने तयारी गरेका छन्।

किसानका अनुसार स्थानीय जातको स्याउ बगैँचामै प्रतिकिलो करिब १८० रुपैयाँसम्ममा बिक्री भइरहेको छ। कृषि तथा पशु विकास कार्यालयका प्रमुख डा. लालमणि अर्यालले प्राविधिक टोलीको अवलोकनमा स्याउमा कुनै समस्या नदेखिएको बताउनुभएको छ।