पार्टी नेतृत्वविरुद्ध षड्यन्त्र भएको निष्कर्षसहित कड़ा प्रतिवाद गर्ने कांग्रेसको निर्णय

नेपाली कांग्रेसले पार्टी नेतृत्व र पार्टीको वैधानिकतामाथि भ्रम सिर्जना गर्न षड्यन्त्र भइरहेको भन्दै त्यसको सशक्त प्रतिवाद गर्ने निर्णय गरेको छ। बिहीबार सानेपास्थित पार्टी कार्यालयमा बसेको पदाधिकारी बैठकले राज्य संरक्षित व्यक्तिहरूमार्फत पार्टी र नेतृत्वविरुद्ध भ्रम तथा षड्यन्त्र सिर्जना गर्न खोजिएको निष्कर्ष निकालेको हो।

बैठकले पार्टी सभापति गगनकुमार थापालाई पक्राउ गर्ने हल्ला फैलाएर सरकारले राजनीतिक विषयान्तर गर्न खोजेको निष्कर्ष पनि निकालेको छ। बैठकमा इनम सापकोटा प्रकरणमा प्रत्यक्ष जोडिएको भन्दै प्रधानमन्त्री वालेन्द्र शाहका राजनीतिक सल्लाहकार कुमार बेनमाथि छानबिन गर्नुपर्ने माग उठेको छ। विपक्षी मोर्चा बलियो बनाउन राजनीतिक संवाद बढाउने निर्णय पनि भएको छ।

कांग्रेसले षड्यन्त्रको प्रतिवाद संसद् र सडकबाट गर्ने जनाएको छ। राज्यले जुनसुकै प्रकारको छानबिन गर्न चाहे पनि कांग्रेस त्यसबाट पछि नहट्ने र पार्टीमाथि लागेका आरोपको यथार्थ आम नागरिकसमक्ष पुर्‍याइने बताइएको छ।

महामन्त्री प्रदीप पौडेलले सरकारले आफ्ना गल्ती र कमजोरी ढाकछोप गर्न सभापति थापाबारे अफवाह फैलाएको आरोप लगाउँदै धम्की दिँदैमा कांग्रेस नतर्सिने बताएका छन्।