आईजीपीबाट हटाइएका दानबहादुर कार्कीको रिट दर्ता भएन, सल्लाहकार पद अस्वीकार

नेपाल प्रहरीको महानिरीक्षक (आईजीपी) पदबाट हटाइएका दानबहादुर कार्कीले पुनर्बहाली माग गर्दै सर्वोच्च अदालतमा दिएको रिट निवेदन बिहीबार दर्ता हुन सकेन। सर्वोच्च प्रशासनले रिटलाई अध्ययनका लागि राखेको छ। दर्ताबारे निर्णय हुन बाँकी रहेको बताइएको छ।

मन्त्रिपरिषद्को बुधबारको बैठकले कार्कीलाई आईजीपीबाट हटाएर डा. मनोजकुमार केसीलाई नयाँ आईजीपी नियुक्त गरेको थियो। कार्कीका लागि भने नयाँ दरबन्दी सिर्जना गरी प्रधानमन्त्री तथा मन्त्रिपरिषद् कार्यालयमा ‘विशेष सुरक्षा सल्लाहकार’ पद बनाइएको थियो। कार्की त्यही निर्णयविरुद्ध सर्वोच्च पुगेका हुन्।

कार्कीले ‘विशेष सुरक्षा सल्लाहकार’ पद अस्वीकार गरेका छन्। प्रधानमन्त्री कार्यालयको २०७ नम्बर कोठामा उनका लागि छुट्टै कार्यकक्ष तयार गरिएको भए पनि उनी नियुक्तिसम्बन्धी पत्र लिन गएनन्।