कोरला नाकाबाट पहिलोपटक भेडाच्याङ्ग्रा भित्रिन थाले

नेपाल–चीन उत्तरी कोरला नाकाबाट पहिलोपटक भेडा र च्याङ्ग्रा नेपाल भित्रिन थालेका छन्। लोमान्थाङ–४ न्हेचुङस्थित क्वारेन्टाइन चेकपोस्टका अनुसार तिब्बतबाट चार हुल भेडाच्याङ्ग्रा नाका पार गरेका हुन्। पशु क्वारेन्टाइन कार्यालय पोखराका प्रमुख एवं वरिष्ठ पशुचिकित्सक डा.

गणेश केसीका अनुसार भदौ ३१ गतेदेखि लगातार तीन दिनसम्म चार लटमा ४१९ वटा भेडाच्याङ्ग्रा भित्रिएका छन्। भदौ ३१ गते च्याङ्ग्रा १५५, असोज १ गते च्याङ्ग्रा ११८ र भेडा ४६ तथा असोज २ गते च्याङ्ग्रा १०० वटा भित्रिएको उहाँले जानकारी दिनुभएको छ। लोमान्थाङ गाउँपालिकाका जनप्रतिनिधि र स्थानीय व्यापारीले पशुपालन प्रयोजनका लागि तिब्बतबाट यी पशु खरिद गरेका हुन्।

क्वारेन्टाइन ऐनअनुसार पशु स्वास्थ्यको प्रमाण र खोपको विवरणका आधारमा मात्र विदेशबाट पशु भित्र्याउन पाइने व्यवस्था छ। कोरला नाकाबाट पहिलोपटक १० कन्टेनर भेडाको ऊन पनि नेपाल भित्रिएको पशु क्वारेन्टाइन कार्यालय पोखराले जनाएको छ। गत वर्षको भदौ ३१ गतेदेखि कोरला नाका पूर्ण रूपमा सञ्चालनमा आएको हो।

रसुवागढी र तातोपानी नाका बन्द भएपछि चीनबाट आउने मालवस्तुका लागि कोरला प्रमुख वैकल्पिक नाकाका रूपमा विकसित भइरहेको छ। यस वर्ष उपल्लो डोल्पाको छोङ्ग्रा मेला सञ्चालन हुन नसक्दा च्याङ्ग्राको आपूर्तिमा असर परेको स्थानीयको भनाइ छ। दसैँ–तिहारलाई लक्षित गर्दै कोरला नाका हुँदै च्याङ्ग्राको आयात सुरु भएको हो।