नेपालसहित ५० देशका नागरिकलाई अमेरिकी भिसा बन्ड अनिवार्य

अमेरिकाले पर्यटक तथा व्यावसायिक प्रयोजनको बी–१/बी–२ भिसा माग्ने नेपालीसहित ५० देशका नागरिकलाई भिसा बन्ड अनिवार्य गरेको छ। अमेरिकी विदेश मन्त्रालयले शुक्रबार यस्तो बन्ड बुझाउनुपर्ने देशको संशोधित सूची सार्वजनिक गरेको हो। सूचीमा परेका देशका आवेदकले अन्तर्वार्तामा कन्सुलर अधिकारीले तोकेबमोजिम १० हजार, १५ हजार वा २० हजार डलर बन्डका रूपमा जम्मा गर्नुपर्नेछ।

दक्षिण एसियाबाट बङ्गलादेश र भुटान पनि सूचीमा छन् भने भारतलाई छुट दिइएको छ। मन्त्रालयका अनुसार नेपाल र बङ्गलादेशका नागरिकका लागि यो व्यवस्था जनवरी २१ देखि लागू भएको हो। भुटानलाई भने जनवरी १ देखि नै सूचीमा राखिएको थियो।

अफ्रिका, क्यारिबियन, मध्य एसिया र प्रशान्त क्षेत्रका अन्य देश पनि यस सूचीमा छन्। नेपाल राष्ट्र बैंकको आजको बिक्री दर एक डलर बराबर १५४ रुपैयाँ ४१ पैसाअनुसार २० हजार डलर करिब ३० लाख ८८ हजार रुपैयाँ हुन्छ।