लुम्बिनी विकास कोषको नियुक्ति: प्रश्न गर्नेमाथि धरपकडको कांग्रेसद्वारा विरोध

नेपाली कांग्रेसका महामन्त्री प्रदीप पौडेलले लुम्बिनी विकास कोषको उपाध्यक्ष नियुक्तिबारे प्रश्न उठाउने नागरिकलाई सरकारले पक्राउ गरेकोमा आपत्ति जनाउनुभएको छ। मंगलबार फेसबुकमा लेख्दै उहाँले विवादित नियुक्ति सुधार्नुको सट्टा आलोचक नागरिकलाई मध्यरातमा समातेर पछि छाडिएको बताउनुभएको छ। सरकारको यस्तो व्यवहारलाई समर्थन गर्न नसकिने उहाँको भनाइ छ।

महामन्त्री पौडेलले कोषको उपाध्यक्षमा नियुक्त आनी छोइङ डोल्माको नागरिकता र आर्थिक कारोबारबारे सार्वजनिक रूपमा प्रश्न उठेको उल्लेख गर्नुभएको छ। ती प्रश्नको उत्तर नदिई सरकारले नियुक्तिको औचित्य र छनोटको आधार प्रस्ट पार्न नसक्ने उहाँले बताउनुभएको छ। उहाँका अनुसार राष्ट्रिय र अन्तर्राष्ट्रिय महत्त्वको यो संस्थाको नेतृत्व छान्दा लोकप्रियता मात्र पर्याप्त हुँदैन।

योग्यता, संस्थागत क्षमता, विश्वसनीयता, नैतिक चरित्र र जवाफदेहिता पनि अनिवार्य रूपमा हेर्नुपर्ने उहाँको धारणा छ। लुम्बिनी बुद्धको जन्मभूमि मात्र होइन, देशको अन्तर्राष्ट्रिय पहिचान, धार्मिक आस्था र सांस्कृतिक गौरवसँग गाँसिएको सम्पदा पनि भएको उहाँले स्मरण गराउनुभएको छ। रातारात जाग्ने अहंकारलाई शासन भन्न नमिल्ने टिप्पणी गर्दै पौडेलले निर्णय गलत भए सच्याउने साहस देखाउन र प्रश्न सोध्ने नागरिकलाई नतर्साउन सरकारसँग आग्रह गर्नुभएको छ।