मस्कोमा इरानी राष्ट्रपति र कतारी अमिरबीच भेटवार्ता

इरानका राष्ट्रपति मसुद पेजेस्कियन र कतारका अमिर तमिम बिन हमाद अल थानीबीच रुसको राजधानी मस्कोमा भेटवार्ता भएको छ। मस्कोमा भइरहेको ग्यास निर्यातक मुलुकहरूको मञ्चको शिखर सम्मेलनका क्रममा दुई नेताबीच भेट भएको इरानी सरकारी सञ्चारमाध्यमले जनाएको छ। इरानी सरकारी टेलिभिजनका अनुसार भेटमा तेहरान र दोहाबीचको हालको सम्बन्धको समीक्षा गरिएको थियो।

दुवै पक्षले राजनीतिक र आर्थिक सम्बन्धलाई अझ बलियो बनाउने तथा द्विपक्षीय सहयोग फराकिलो पार्ने सम्भावनामा जोड दिएका छन्। मध्यपूर्वमा चलिरहेको युद्धबारे कुराकानी भयो कि भएन भन्ने विषय सरकारी विवरणमा उल्लेख छैन। फेब्रुअरी २८ मा अमेरिका र इजरायलले इरानमाथि आक्रमण गरेपछि युद्ध सुरु भएको थियो।

त्यसक्रममा इरानले कतारसहित क्षेत्रका विभिन्न ठाउँमा क्षेप्यास्त्र र ड्रोन प्रहार गरेको थियो। कतार पछिल्ला महिनामा खाडी क्षेत्रमा फैलिएको युद्ध रोक्ने कूटनीतिक र मध्यस्थताका प्रयासमा सक्रिय छ। इरान र कतारले खाडीमा रहेको विश्वकै ठूलो प्राकृतिक ग्यास क्षेत्र साझा रूपमा उपयोग गर्दै आएका छन्।

राष्ट्रपति पेजेस्कियनको मङ्गलबार नै रुसी राष्ट्रपति भ्लादिमिर पुटिनसँग पनि भेटवार्ता गर्ने कार्यतालिका छ। अक्टोबरको सुरुमा राष्ट्रपति पुटिनले मध्यपूर्वको युद्ध अन्त्यका लागि हुने मध्यस्थतामा रुस सहभागी हुन तयार रहेको बताउनुभएको थियो।