इजरायलको निर्वाचनमा रेकर्ड मतदान

इजरायलमा मङ्गलबार भएको राष्ट्रिय निर्वाचनमा साँझ ४ बजेसम्मको मतदानदर सन् १९७३ यताकै सबैभन्दा उच्च भएको छ। केन्द्रीय निर्वाचन समितिका अनुसार स्थानीय समय ४ बजेसम्म करिब ५५.७ प्रतिशत मतदाताले मत खसालेका छन्। सन् २०२२ को निर्वाचनमा सोही समयसम्म करिब ४७.५ प्रतिशत मात्र मतदान भएको समितिको तथ्याङ्कमा उल्लेख छ।

४ बजेसम्म ४० लाखभन्दा बढी नागरिकले मताधिकार प्रयोग गरिसकेका छन्। निर्वाचनमा ७० लाखभन्दा बढी मतदाता मतदान गर्न योग्य छन्। सन् २०२३ अक्टोबर ७ को हमास आक्रमणपछि सुरु भएको गाजा युद्धपछिको यो पहिलो आम निर्वाचन हो।

प्रधानमन्त्री बेन्जामिन नेतान्याहुलाई पूर्वसेनाप्रमुख गादी आइसेनकोट नेतृत्वको विपक्षी समूहले कडा चुनौती दिएको छ। इस्लामवादी राआम पार्टीका प्रमुख मन्सुर अब्बासले अरब समुदायको मतले सरकार परिवर्तन गर्न सक्ने बताउनुभएको छ। नेतान्याहुको लिकुड पार्टीले मतदानको समय थप्न समितिमा निवेदन दिएको थियो, तर त्यसको स्पष्ट कारण खुलाएको छैन।

शास र ओट्ज्मा येहुदित पार्टीले उक्त निवेदनलाई समर्थन गरेका छन्। आइसेनकोटको याशर पार्टीले भने समय थप्नुपर्ने कुनै असामान्य अवस्था नरहेको भन्दै विरोध गरेको छ। समितिले समय नथपी राति १० बजेसम्म मतदान गर्न दिने जनाएको छ।

इजरायली संसद् नेसेटमा १२० सिट छन् र अहिलेसम्म कुनै एक दलले त्यहाँ एक्लै स्पष्ट बहुमत ल्याएको छैन।