उखुको समर्थन मूल्य तोक्न ढिलाइ, किसान सस्तोमा बेच्न बाध्य

सरकारले उखुको समर्थन मूल्य अझै नतोक्दा उखु किसानहरू गत वर्षकै दरमा खाडसारी उद्योगलाई उखु बेच्न बाध्य भएका छन्। छठ पर्वमा प्रसादका लागि सख्खरको माग बढेपछि खाडसारी उद्योगहरूले उखु पेल्न थालेका छन्। उखु नगदे बाली भए पनि उचित मूल्य नमिल्दा किसानले खर्चअनुसार फाइदा लिन सकेका छैनन्।

उखु उत्पादक संघका अध्यक्ष अशोक यादवका अनुसार यस वर्ष खेतीको लागत झन्डै दोब्बर पुगेको छ। इन्धनको मूल्य करिब डेढ गुणा तथा मलखाद र खेत जोताइको खर्च करिब दोब्बर भएको उहाँले बताउनुभएको छ। यसका साथै बीउ, सिँचाइ, ज्यालादारी र उद्योगसम्म उखु पुर्‍याउने ढुवानी खर्चसमेत महँगिएको छ।

किसान प्रतिनिधिहरूले यस वर्ष उखुको मूल्य गत वर्षको दोब्बर हुनुपर्ने माग गरेका छन्। मूल्य निर्धारणका लागि सरकारी टोलीले अध्ययन सकेर फर्किए पनि निर्णय नभएको किसान अगुवा कामेश्वर सहनीले बताउनुभएको छ। पर्साको गढीमाई नगरपालिका–४ का किसान राजन ठाकुरका अनुसार बजारमा सख्खर प्रतिकिलो करिब १२० रुपैयाँसम्म बिकिरहेको छ।

खेतमा उखु सुक्ने जोखिम र दलहन तथा तेलहन बाली लगाउनुपर्ने भएकाले किसानले सस्तोमा बेचिरहेको उहाँले बताउनुभएको छ। अर्का किसान सन्तोष पटेलले खुटी उखु प्रतिक्विन्टल करिब ५०० रुपैयाँमा बेच्नुपरेको जानकारी दिनुभएको छ। उद्योग नियमित चल्ने सुनिश्चितता नभएकाले उहाँले यो निर्णय गर्नुपरेको हो।